کندهار (پژواک، ۴ غويی ۱۴۰۰): چارواکي وايي چې په کندهار کې وسله والو د حاجي عبدالغني مسلمیار په نوم یو پخوانی ولسوال وژلی دی.
د هغه جسد پرون ماښام ناوخته د کندهار د دامان او زابل د شهر صفا ولسوالیو ترمنځ سیمه کې موندل شوی دی.
د کندهار امنیې قوماندانۍ ویاند لومړی څارن جمال ناصر بارکزی پېښه تاییدوي او وايي، دا چې هغه څنګه او د چا له خوا وژل شوی، په اړه یې پلټنې روانې دي.
يوې باوري امنیتي سرچینې پژواک ته وویل حاجي عبدالغني مسلمیار د جمعې په ورځ په دامان ولسوالۍ کې خپل باغ ته تللی و چې لومړی تښتول شوی او بیا وژل شوی دی.
سرچینه دا هم وايي چې له هغه سره دوه ساتونکي هم وو چې اوس نادرکه دي.
عبدالغني مسلمیار د کندهار د سپين بولدک، ارغستان، شاولیکوټ او معروف ولسوالیو د ولسوال په توګه دندې ترسره کړې وې.
نوموړی درې میاشتې مخکې هغه مهال له دندې ګوښه شو چې د کندهار والي د ټولو ۱۷ ولسوالیو لپاره نوي ولسوالان وټاکل.
د کندهار والي روح الله خانزاده پر دې پېښه خواشیني ښودلې ده.
په دې اړه د ولایت له مقامه په خپره شوې خبرپاڼه کې راغلي چې عبدالغني مسلمیار کلونه کلونه هېواد او خلکو ته نه ستړي کېدونکي خدمات ترسره کړل چې د دامان او شهر صفا ولسوالیو ترمنځ د خپل کور په ساحه کې د ناپېژاندو وسله والو له خوا په بې رحمۍ وژل شوی دی.
تر دې مهاله د یادې پېښې په اړه کومې وسله والې ډلې څه نه دي ویلي.
Views: 50
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن