کندهار (پژواک، ۳۱ غبرګولی ۱۴۰۰): د کندهار په ارغنداب او ژېړۍ ولسوالیو کې سلګونو وګړو د وسله والو پر خلاف پاڅون کړی، وسلې یې اخیستي او وايي، د خپلو سیمو امنیت ساتي.
د یادو شوو ولسوالیو اوسېدونکي دغه ګام تر هغه وروسته اخلي چې وسله والو پر دغو ولسوالیو بریدونه وکړل او تېرې شاوخوا شپږ میاشتې د سختو جګړو شاهدې وې.
دغو جګړو د مرګ ژوبلې تر څنګ د خلکو کورونو، باغونو، ټولګټو ځایونو ته درانه زیانونه واړول.
ولسي پاڅون کوونکو له پژواک خبري اژانس سره په خبرو کې وویل چې جګړو، ناامنیو او د ټولګټو تاسیساتو ورانولو اړ کړل چې پاڅون وکړي.
د دې ولسوالۍ یوه اوسېدونکي عبدالرحمن پژواک خبري اژانس ته وویل، بالاخره خلک اړ شول چې پاڅون وکړي، وسلې واخلې او د خپلو سیمو امنیت خوندي کړي.
هغه زیاته کړه، وسله والو تر شپږ میاشتو ډېر په ارغنداب ولسوالۍ کې جګړه وکړه، زرګونه خلک کورونو پرېښودو ته اړ شول، مرګ ژوبله ور واوښته، کورونه، باغونه، سړکونه، پلونه او نور تاسیسات یې ویجاړ شول، موږ پورته شوي یو چې د وسله والو د دغو کړنو مخنیوی وکړو.
هغه زیاته کړه: ((نور وسله والو ته اجازه نه ورکوو چې زموږ سیمې ته جنګ راوړي، زموږ کورونه، باغونه، پلونه او عامه شتمنۍ ورانې کړي.))
دی وايي، د ارغنداب ولسوالۍ سلګونه اوسېدونکي په خپله خوښه چمتو شوي چې وسله واخلي او د خپلو سیمو امنیت خوندي کړي.
د ژېړۍ ولسوالۍ د سنځري سیمې اوسېدونکی عبدالغني له هغو کسانو دی چې له خپلو لسګونو نورو کلیوالو سره یو ځای یې وسله اخیستې او پاڅون یې کړی دی.
هغه پژواک ته وویل: ((وسله مو د دې لپاره واخیسته او پاڅون مو وکړ چې تېرې څو میاشتې چې وسله وال ارغنداب، ژېړۍ او پنجوايي ولسوالیو ته راغلل، هر څه یې وران کړل، دلته یې په زرګونو ماینونه وکرل چې تر اوسه خلک وژني او ټپيان کوي یې.))
د ده په خبره، خلک اړ شول چې د دغو جنایتونو پر وړاندې پاڅون وکړي او د خپلو سیمو امنیت خوندي کړي.
دی وايي، همدا یې هېواد او نظام دی چې د ساتنې لپاره یې هر راز قرباني ورکوي.
د ده په خبره، په ژېړۍ ولسوالۍ کې دمګړۍ ۱۰۰ پاڅون کوونکی چمتو شوي چې تر راتلونکو څو ورځو به یې شمېر ۳۰۰ تنو ته ورسېږي.
د ارغنداب ولسوال انجنیر محمد شریف پژواک خبري اژانس ته وویل، په دغې ولسوالۍ کې د ولسي پاڅون کوونکو ۱۰۰ کسیزه قطعه د امنیت په ساتلو کې له خپلو امنیتي ځواکونو سره مرسته کوي.
هغه زیاته کړه، دغو خلکو په خپله خوښه پاڅون کړی چې د ملي امنیت ریاست له خوا وسلې ورکړل شوې دي.
د ده په خبره، د ولسي پاڅون کوونکو دغه قطعه به د دې ولسوالۍ په ۵ سیمو کې پوستې ولري او د امنیت ساتنې دنده به مخ ته وړي.
د کندهار د ملي امنیت ریاست مرستیال عبدالتواب پژواک خبري اژانس ته وویل، په ارغنداب او ژېړۍ ولسوالیو کې تر سختو جګړو وروسته د دغو سیمو اوسېدونکو په خپله خوښه د وسله والو پر خلاف پاڅون کړی دی.
هغه زیاته کړه، د دوی دنده دا ده چې د دغو خلکو حمایه او مرسته وکړي.
دی وايي، تر دې مهاله په ارغنداب او ژېړۍ ولسوالیو کې د پاڅون کوونکو شمېر تر ۲۰۰ اوړي، خو تر راتلونکو ورځو به دغه شمېر په هره ولسوالي کې تر درې سوه تنو ورسېږي چې د امنیت ساتنې دنده به مخ ته وړي.
دغه راز ده خبر ورکړ چې په شاولیکوټ ولسوالۍ کې هم خلک چمتو شوي چې پاڅون وکړي او د خپلو سیمو امنیت خوندي کړي.
د یادونې ده چې د کندهار ارغنداب، ژېړۍ او پنجوايي هغه ولسوالۍ دي چې تېرې څو میاشتې د سختو او پر له پسې جګړو شاهدې وې.
په ورته توګه په دې وروستیو کې شاولیکوټ ولسوالي هم له ورته برخلیک سره مخامخ ده.
چارواکي وايي، وسله والو یواځې د ارغنداب ولسوالۍ د اوسېدونکو سلګونه کورونه، لارې، شاوخوا ۲۰۰ پلونه، روغتیايي مرکزونه او ښوونځي ویجاړ کړي چې مرکزي ادارې یې د بیارغونې ژمنه کړې ده.
Views: 512
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن