کندهار (پژواک، ۲۶ چنګاښ ۱۴۰۰): د کندهار والي وايي، د دغه ولایت د اوسني بد وضعیت عاملین هغه څوک دي چې د نظام پر ځای اشخاصو ته وفادار وو.
ده وویل، کندهار نظامي نه، بلکې سیاسي سقوط کړی او په دې کې د هغو قومي مشرانو لاس دی چې تېر شل کلونه یې ولس یرغمل کړی کړی و او د هغوی حقوق یې خوړل.
روح الله خانزاده دغه څرګندونې په یوې خبرې غونډه کې وکړې چې په کې د کورنیو چارو وزارت ستر امنیتي مرستیال ستر پاسوال عبدالرحمن رحمن او د هېواد د کومانډو ځواکونو قوماندان جنرال هیبت الله علیزي ګډون کړی و.
د کندهار والي وویل: “خپل ولس ته چې تېر شل کلونه خپلو قومي مشرانو پر سر- سر وهلی، ډاډ ورکوم چې موږ او ټول امنیتي او دفاعي ځواکونه ستاسې په څنګ کې یو او د ژوند تر وروستیو به ستاسې د سر، مال، ناموس او خاورې ساتنه کوو.”
هغه زیاته کړه، ګیله یې د کندهار له هغو مشرانو ده چې نن په کابل کې ناست دي؛ یو وايي، زه ۱۰زره کسان لرم، بل وايي ۸ زره کسان لرم، بل وايي ۵زره کسان لرم، یو وايي ما د قول اردو قوماندان کړه، بل وايي ما امنیه قوماندان کړه.
د ده په خبره، څلور- پنځه ورځې کېږي چې د کورنیو چارو وزارت معین د ولسمشر په ځانګړې لارښوونه کندهار ته راغلی، څو معلومه کړي چې دا کسان د کندهار ساتنې ته حاضرېږي او که نه، خو له بده مرغه یو هم نه حاضرېږي.
خانزاده زیاته کړه: “اوس هم د کندهار همدا مشران په ارګ کې زورونه وهي او د ولس له وینو او غوښو تغذیه کېږي، ما ځکه تر اوسه د دوی په اړه ولس، رسنیو او مرکز ته شکایت نه کاوه چې د کندهار حیثیت مې ساته.”
خو دی وايي، نن دی مجبور شو چې خلکو ته په ډاګه ووايي چې کندهار نظامي نه، بلکې سیاسي سقوط کړی دی.
ده ګواښ وکړ، له اختر وروسته چې لږ حالت ښه شي د کندهار د ټولو قومي مشرانو فساد به رسوا کړي چې د ولس میلیونونه افغانۍ یې وهلي او پر کندهار نننۍ بده ورځ هم د دوی له لاسه راغلې ده.
ده وویل: “همدغو قومي مشرانو په یوه ټلیفوني اړیکه امنیتي ځواکونه اړ کړي چې ولسوالۍ طالبانو ته پرېږدي.”
د ده په خبره، له همدې امله په زرګونو پولیسو دندې پرې ایښي او پر کور کښېناستلي دي.
هغه زیاتوي: “شواهد او ثبوتونه لرو، څلو ورځې کېږي چې پوستې په خپل سر خوشې شوي، خو طالبان ورغلي هم نه دي.”
د ده په خبره، موږ همدا ویل چې امنیتي ادارې باید له قومي جوړښتونو ووځي، امنیتي ځواکونه باید د اشخاصو پر ځای نظام او سیسټم ته وفادار وي، نن هماغو خلکو پر کندهار بده ورځ راوستلې ده او جګړه یې د ښار دروازو ته را ورسوله.
والي وویل: “زما دې په خدای ج قسم وي چې لږ له دې اوسني حالته ووځو، زه ژمنه کوم ټول قومي مشران به یو په یو رسوا کړم چې هغوی تېر شل کلونه کوم فساد کړی دی، ما چې د فساد پر ضد مبارزه پیل کړه هغوی په سیاسي سقوط لاس پورې کړ.”
ده یو ځل بیا ډاډ ورکړ چې کندهار به هیڅکله سقوط ته پرېنږدي.
د نوموړي په وینا، همدا اوس پر دې کار روان دی چې د کندهار اداره باید د ولسمشر تر امر لاندې وي نه د قومي مشر او کوم شخص، د پولیسو په لیکو کې به هغه کسان راولو چې نظام ته وفادار دي نه اشخاصو ته.
د کورنیو چارو وزارت معین ستر پاسوال عبدالرحمن رحمن وویل، اوسنی جنګ چې په افغانستان او کندهار کې پیل شوی د اسلام نه بلکې د اسلام اباد جنګ دی.
هغه ډاډ ورکړ، تر هغه چې یو امنیتي سرتېری ژوندی وي، کندهار به ژوندی وي، ځکه کندهار د افغانستان زړه دی.
د ده په خبره، د کندهار ساتنه له کابل څخه هم ډېر ارزښت لري.
ده خبر ورکړ چې امنیتي ځواکونه په پوره قوت سره په کندهار کې عملیات مخ ته وړي او وسله یې سخت ځپلي دي.
دی وايي، یوازې په تېرو ۲۴ ساعتونو کې په کندهار ښار او ولسوالیو کې ۱۴۵ وسله والو ته مرګ ژوبله اوښتې ده چې د دوی ډېر مهم مشران او د سرو قطعو قوماندانان په کې شامل دي.
د ده په خبره، پر وسله والو به خپلو ځپونکو عملیاتو ته دوام ورکوي.
ده دا هم وویل، هغه څه چې په کندهار کې پېښ شول اوس یې پر لاملونو نه غږېږي خو ډاډ ورکوو چې روان وضعیت بدلېدونکی دی.
Views: 75
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن