کابل (پژواک، ۲۶ لړم ۱۴۰۰): د کرکټ نړيوالې شورا/ICC په خپله کلنۍ غونډه کې د افغانستان کرکټ د څار لپاره د يوې کمېټې پر جوړولو موافقه کړې ده.
دغه غونډه تېره ورځ (د نومبر په ۱۶مه) په اماراتو کې جوړه شوه.
په غونډه کې د افغانستان کرکټ لپاره يوه کمېټه جوړه شوې چې د نوي حکومت په راتګ په افغانستان کې کرکټ وڅاري.
د کرکټ د نړيوالې شورا له لوري د افغانستان کرکټ د څار لپاره د جوړه شوې کمېټې مشري عمران خواجه پر غاړه لري او دغه راز روس مکالم، لاوسن ناېدو او رميز راجه د دغې کمېټې غړي ټاکل شوي دي.
د کرکټ نړيوالې شورا مشر ګرېګ برکلي ويلي چې ياده شورا په افغانستان کې د ښځو او نارینه وو کرکټ پرمختګ او ملاتړ ته ژمنه ده.
نوموړي زياته کړې چې په دې برخه کې به د خپلو غړو بورډونو په هڅو او ملاتړ سره وکولای شي چې د نوي حکومت مرسته او همکاري ترلاسه کړي.
ده ويلي، کرکټ په افغانستان کې ښه روان دی او مثبت تغير یې رامنځته کړی دی.
هغه وايي، د افغانستان ملي ټيم د دوی لپاره وياړ دی او هڅه کوي چې غړیتوب یې خوندي پاتې شي.
د هغه په وينا، دوی به د افغانستان کرکټ له نږدې وڅاري او وروسته به يې په اړه پرېکړه وکړي.
د کرکټ نړیواله شورا له هغه وروسته د افغانستان کرکټ په اړه غونډه کوي چې څه باندې درې میاشتې مخکې په هېواد کې سیاسي بدلون راغلی او طالبان واک ته رسېدلي دي.
واک ته د طالبانو له رسېدو سره حاجي عزیز الله فضلي د کرکټ بورډ د رییس په توګه وټاکل شو، خو په دې وروستیو کې یې پر ځای پخوانی لوبغاړی میرویس اشرف ټاکل شوی دی.
دغه ټاکنه داسې مهال وشوه چې د افغانستان کرکټ لوبډله په متحده عربي اماراتو کې د کرکټ نړیوال شل اووریز جام په سیالیو کې بوخته وه.
