<p style="text-align: justify;">پل علم (پژواک، ۲۲ کب ۱۴۰۰): د لوګر سرې مياشتې رياست مسوولین وايي، نن يې د ترکيې هېواد له خوا شوې مرسته پر ۵۰۰ بېوزلو کورنيو ووېشله.</p>
<p style="text-align: justify;">د دغه ولايت سرې مياشتې رييس مولوي نصرت پژواک خبري اژانس ته وويل چې دغه مرستې د ياد ولايت په محمداغې ولسوالۍ کې ووېشل شوې.</p>
<p style="text-align: justify;">ده وويل چې د مستحقو کورنيو د انتخاب لپاره مخکې په شفاف ډول سروې ترسره شوې وه.</p>
<p style="text-align: justify;">نصرت زياته کړه چې ياده مرسته د ترکيې هېواد له خوا شوې چې د هرې کورنۍ لپاره ۵۰ کيلو اوړه، شپږ لېتره غوړي، يو من بوره، نيم من وريجې، يوه اندازه دال او شين چای او يوه بسته البسه شامل دي.</p>
<p style="text-align: justify;">سرچينې ونه ويل چې په البسه کې کوم مواد شامل دي.</p>
<p style="text-align: justify;">د محمداغې ولسوالۍ د دهنو کلي اوسېدونکي عبدالجبار چې دغه مرسته يې ترلاسه کړې، پژواک ته وويل چې اقتصادي وضعيت يې خراب دی او دغه مرسته به د دوی ستونزې تر يوې اندازې راکمې کړي.</p>
<p style="text-align: justify;">هغه زیاته کړه: "قيمتي او بېوزلي ډېره ده، خلک له سختو اقتصادي ستونزو سره مخ دي، نو له اسلامي امارت څخه غواړم چې د اړمنو او شهيدانو له کورنيو سره مرستو ته دوام ورکړي."</p>
<p style="text-align: justify;">د يادې ولسوالۍ د کتب خېلو سیمې یوه اوسېدونکي عبدالله هم پژواک ته وويل: "زه د يوې غريبې کورنۍ سرپرست يم چې په کور کې خواړه او نغدې پيسې نه لرم او ډېر خوشاله يم چې نن مې مرسته ترلاسه کړه."</p>
<p style="text-align: justify;">هغه وايي: "له يوې خوا کار نشته او له بلې خوا د خوراکي توکو بيې ډېرې لوړې شوې، له حکومت او خيريه موسساتو غواړم چې مرستو ته دې دوام ورکړي."</p>
<p style="text-align: justify;">د يادونې ده، له دې مخکې هم د لوګر په ټولو ولسواليو کې څو ځله د سرې میاشتې په ګډون، يونيسف، آی آر سي او نورو مرستندویه ادارو له لورې له اړو کورنيو سره د نغدو پيسو، البسې او خوراکي توکو مرسته شوې.</p>
