[restrict paid=”true”]
کابل (پژواک، ۱۰ وری ۱۴۰۱): پاکستاني طالبانو د روژې په میاشت کې په دغه هېواد کې د پسرلنیو عملیاتو له پیلېدو خبر ورکړی دی.
دا لومړی ځل دی چې «تحریک طالبان پاکستان» د روژې په میاشت کې د داسې عملیاتو پیلولو خبر ورکوي؛ له دې مخکې به هر کال افغان طالبانو په افغانستان کې دغه ډول عملیات اعلانول.
د پاکستاني طالبانو ویاند محمد خراساني په یوه اعلامیه کې ویلي چې دغه عملیات به د روژې په لومړۍ ورځ پیلېږي چې د پاکستان امنیتي ځواکونه او د هغوی همکاران به په کې په نښه کېږي.
سرچینې زیاته کړې: «په دغو عملیاتو کې استشهادي عملیات، تهاجمي بریدونه، د ماینونو عملیات، د بریدونو د مخنیوي عملیات، هدفي بریدونه، د لایزر او نښه ویشتونکي بریدونه شامل دي.»
دا په داسې حال کې ده چې د پسرلنیو عملیاتو له پیلېدو مخکې بریدونه شوي او په تېرو دوو ورځو کې یې د خیبر پښتونخوا په ټانک او وزیرستان سیمو کې ۳۴ پاکستاني سرتېرو ته مرګ ژوبله اړولې ده.
د یادونې ده، د پاکستان د حکومت او پاکستاني طالبانو ترمنځ په تېره ډسمبر میاشت کې د سولې تړون هم شوی و او د افغانستان طالبانو په دغه تړون کې منځګړتوب کړی و، خو له یوې میاشتې وروسته دغه تړون ختم شوی او پاکستاني طالبانو د خپلو بریدونو د بېرته پیلولو اعلان کړی و.
[/restrict]
Views: 543
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن