<p style="text-align: justify;">اسعد اباد (پژواک، ۱۷ غبرګولی ۱۴۰۱): د کونړ ولایت د ناړۍ ولسوالۍ چيراګل درې ته د لومړي ځل لپاره خام سړک ورجوړ شو او خلکو یې په خوشحالۍ کې پر ورغلو موټرو ګلونه وشیندل او ډزې یې وکړې.</p>
<p style="text-align: justify;">دغه سړک - چې نږدې ۱۲ کیلومتره اوږدوالی لري او د ملي دفاع وزارت له خوا جوړ شوی - یاده دره د ناړۍ ولسوالۍ له مرکز سره نښلوي.</p>
<p style="text-align: justify;">د ناړۍ ولسوال مولوي محمد ظاهر پژواک ته وویل، د چیراګل درې د سړک جوړولو چارې د نږدې دوو میاشتو په موده کې بشپړې شوې.</p>
<p style="text-align: justify;">هغه وویل: «د د فاع وزارت په مالي همکارۍ د چیراګل درې ته د سړک جوړېدو پر مهال د سیمې نږدې ۴۰۰ کسانو ته د کار زمینه هم برابره شوې وه.»</p>
<p style="text-align: justify;">هغه زیاته کړه چې یاد سړک نه یوازې د خلکو لپاره د تګ راتګ اسانتياوې برابرې کړې، بلکې د امنیتي ځواکونو پوستو ته هم اکمالات ورباندې کېږي.</p>
<p style="text-align: justify;">د یادې درې یوه اوسېدونکي عبدالواحد وويل چې کلیوال يې د سړک جوړېدو له امله دومره خوښ شول چې د موټرو ورتګ يې پر ګلانو او ډزو بدرګه کړ.</p>
<p style="text-align: justify;">د چیراګل درې یوه قومي مشر فاروق هم د دوی سيمې ته د سړک پر جوړېدو خوښي څرګنده کړه.</p>
<p style="text-align: justify;">ده وویل چې پخوا به خلکو خپل ناروغان پر څارويو تر روغتونه رسول، خو اوس دفاع وزارت د دوی سيمې ته سړک جوړ کړ او د خلکو ستونزې تر ډېره ورسره حل شوې.</p>
<p style="text-align: justify;">نوموړي له حکومته غوښتنه وکړه چې دغه سړک دې پوخ کړي، څو ورښتونه او سېلابونه یې بېرته خراب نه کړي.</p>
<p style="text-align: justify;">د يادونې ده، ناړۍ د ډیورنډ له فرضي کرښې سره ګډه پوله لري او خلک يې تر ډېره مالدار دي.</p>
