لښکرګاه (پژواک، ۲۶ چنګاښ ۱۴۰۱): د هلمند د اطلاعاتو او فرهنګ ریاست وايي، د دغه ولایت په ګرمسېر ولسوالۍ کې پاکستان ته د اوسپنې د قاچاق په تور اته کسان نیول شوي دي.
د ياد ولایت د اطلاعاتو او فرهنګ ریاست مرستیال مولوی محمدقاسم ریاض پژواک خبري اژانس ته وویل، نیول شوو کسانو غوښتل چې پاکستان ته په ناقانونه ډول اوسپنه یوسي، خو پرون د امنیتي ځواکونو له خوا نیول شوي دي.
ریاض زیاتوي چې امنیتي ځواکونو یاد اته کسان په اوسپنه بار پنځه سهپای موټرو سره یو ځای نيولي دي .
ده وویل چې ياد کسان عدلي او قضايي ارګانونو ته ورپېژندل شوي دي.
د يادونې ده، دا په تېره څه باندې یوه میاشت کې څووم ځل دی چې په هلمند کې پاکستان ته د اوسپنې او مسو د قاچاق په تور کسان نيول کېږي.
د چنګاښ په ۱۵مه هم د هلمند د امنیې قوماندانۍ له درنو جرمونو سره د مبارزې مدیریت مسوولینو خبر ورکړی و چې د دغه ولایت په ګرمسېر ولسوالۍ کې يې ۱۵ کسان، پاکستان ته د اوسپنې د قاچاق په تور نیولي دي.
Views: 55
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن