د کندوز – تخار لویه لار چې یو وخت د «جادۀ مرګ» په نوم یادېده، اوس امن شوې ده

تالقان (پژواک، ۱۳ وږی ۱۴۰۱): تخار کې ځیني خلک او موټرچلوونکي چې د تېر حکومت پر مهال د تخارـ کندوز پر لویه لار له ناامنیو او د غیرقانوني پیسو له اخیستل کېدو تر پزې راغلي وو، اوس د لارې امنیت ښه کېدو ته خوښ دي.

 د هغوی په خبره، په وروستیو کلونو کې د هدفي وژنو او غیرقانوني پیسو اخیستل کېدو له امله د خلکو تګ راتګ ستونزمن شوی و، اوس خلک کولی شي پر دې لاره په ارمۍ سره سفر وکړي.

د یادې لارې یوه موټرچلوونکي هدایت‎الله چې له کلونو راهیسې د کابل پر لین موټر چلوي، وویل، د تېر حکومت په وروستیو کلونو کې ناامني ډېره شوې وه څو ځلې د غیرقانوني پیسو اخیستو او د ناپېژانده وسله اله له خوا د  مسافرینو د وژل کېدو شاهد دی.

د هغه په خبره، اوس‌مهال پر دې لاره مسافر او موټر چلوونکي په ډاډه زړه تګ راتګ کوي او هیڅ ډول اندېښنه او تشویش نشته.

د دې لارې یو بل موټرچلوونکی نصرالله وایي: «دوه کاله مخکې د مازدیګر پنځه بجې وې چې زه د کندوز د خان‌اباد ولسوالۍ له لوري تخار ته روان وم، کله چې د تالقان اړوند چنزه‎یي سیمې ته ورسېدم، دلته وسله‎والو چک پاینټ درلود او د یوه ۲۲ کلن ځوان سر یې هم پرې کړی. د دغو نا امنیو لړۍ دی هم په وحشت کې اچولی و.»

نصرالله اوس د دې لارې امنیت له ټينګېدو خوښ دی.

په همدې حال کې د تخار ځيني مدني فعالان هم پر دې لار د سفرونو له جریانه بېلابېل روایتونه لري.

په تخار کې یوه مدني فعال هدایت‌الله پژواک ته وویل، په تېرو کلونو کې د ناامنۍ له امله نه حکومتي کسانو، نه خبریالانو، نه مدني فعالانو او نه سوداګرو  شو کولای شول  چې پر دې لار په اسانۍ سره تګ راتګ وکړي.

هغه زیاتوي، هر ورځ پر دې لار د ځورونو، وژنو او غیرقانوني پیسو اخیستو پېښو شاهد دی خو اوس ټول خلک کولی شي په اسانۍ سره پر دې لاره سفر وکړي.

هغه ټينګار کوي چې اوسنی حکومت دې د دې لارې د امنیت لا ټينګښت په موخه جدي پاملرنه ولري.

یو بل مدني فعال مجبب الرحمن د تېر حکومت د مسوولینو بې‌پروايي د دې لارې د ناامنیو لامل بولي وایي، خلک د ژوند د ټولو ستونزو هوارېدو ترڅنګ د امنیت ټينګښت ته هم اړتیا لري.

له بلې خوا د تخار امنیې قوماندانۍ ویاند مبین صافی ډاډ ورکوي چې د امنیت د لا ټينګښت او پر دې لاره د خلکو د تګ راتګ په موخه امنیتي پوستې فعالې دي او هغوی له دې لارې هر وخت لیدنه کوي.

دا په داسې حال کې ده چې د تخار ـ کندوز لویه لار له هغو عمومي لارو ګڼل کېږي چې د هېواد شمالي ولایتونه د هېواد له مرکز کابل سره نښلوي؛ د تېر حکومت په وروستیو کلونو کې دا لار د ناامنیو له امله  د «جادۀ مرګ» په نوم یادېده.