پل علم (پژواک، ۱۷ تله ۱۴۰۱): د لوګر د کرنې او مالدارۍ ریاست وایي، د دغه ولایت په مرکز پل علم او شپږو ولسوالیو کې یې غواګانو ته د پوستکي ویروسي ناروغۍ/ Lumpy Skin ضد واکسین پیل کړی چې په لړ کې به یې ۹زره غواګانې واکسین شي.
دا ناروغي د لوګر ولایت په ګډون د هېواد په ډېرو ولایتونو کې خپره شوې ده چې تر دې مهاله یې زرګونه غواګانې له منځه وړې دي.
د یاد ولایت د کرنې او مالدارۍ رییس مولوي سید امین هاشمي پژواک خبري اژانس ته وویل، غواګانو ته د پوستکي ویروسي ناروغۍ ضد واکسین د ملګرو ملتونو د خوړو او کرنې ادارې/ FAO په مالي ملاتړ پیل شوی چې د مرکز پل علم ترڅنګ په شپږو ولسوالیو کې پلی کېږي.
دی وايي، د دغه کمپاین په لړ کې به په لوګر کې ۹زره غواګانې د پوستکي ویروسي ناروغۍ پر وړاندې واکسین او د مرګ له خطره به و ژغول شي.
هغه زیاته کړه، تر دې مهاله په دغه ولایت کې سلګونه غواګانې پر دې ناروغۍ اخته شوې چې لسګونه ورڅخه مړې شوې دي.
بلخوا، د لوګر ولایت د مرکز پل علم یوه مالدار حاجي حسینخېل پژواک خبري اژانس ته وویل، ډېر خوشحاله دی چې ټولو غواګانو ته یې د کرنې او مالدراۍ ریاست په همکارۍ د غواګانو د پوستکې یا لمپيسکن ناروغۍ ضد واکسین ولګول شو.
دی وايي، دغې ویروسي ناروغۍ د لوګر په ډېرو سیمو کې د خلکو غواګانې مړې کړې او لا هم ډېرې غواګانې له دې ناروغۍ کړېږي.
د محمداغې ولسوالۍ اوسېدونکی محمد انور وايي، څو ورځې مخکې یې د کور غوا د لمپيسکن ناروغۍ له امله مړه شوه؛ ځکه پر وخت واکسین ورته و نه رسېد.
د هغه په وینا، دغه واکسین باید د ناروغۍ له پيل سره سم پيل شوی وای څو ډېرې غواګانې ژغورل شوې وای.
د کرنې، اوبو لګولو او مالدارۍ وزارت مسوولانو ویلي، تازه یې د هېواد په پنځو مرکزي ولایتونو کابل، کاپیسا، پروان، لوګر او میدانوردګو کې څارویو ته د لمپيسکن ناروغۍ د ۱۲۵زره ډوزه واکسین تطبیق پیل کړی دی.
د کرنې وزارت مسوولان له خلکو غواړي چې پر لمپيسکېن ناروغۍ اخته څاروي قرنطین کړي او د حیواناتو حفظالصحې او د اوسېدو ځای ته جدي پام ولري.
Views: 69
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن