<p style="text-align: justify;">[restrict paid="true"]</p>
<p style="text-align: justify;">اټلانټا (پژواک، ۲۴ لېندۍ ۱۴۰۱): افغانستان لپاره د امریکا د پخوانیو سفیرانو یوې ډلې په یوه لیک کې د امریکا له قانونجوړوونکو غوښتي چې د تازه ورغلو افغانانو د مېشتېدو طرحه باید د امریکا د راتلونکي کال په بودیجه کې شامله شي.</p>
<p style="text-align: justify;">د امریکا غږ د خبر له مخې، د سفیرانو په لیک کې چې پرون (د لېندۍ ۲۳مه) کانګرېس ته لېږل شوی، راغلي چې دا طرحه «زموږ له متحدانو سره د جنګ په وخت کې شوې ژورې او لازمي ژمنې پرځای کوي. دا یو اخلاقي مسوولیت دی او همدارنګه دا خبره یقیني کوي چې په راتلونکو جنګونو کې به ملاتړي ومومو.»</p>
<p style="text-align: justify;">دغه لیک د راین کراکر، رونالډ نیومن، ویلیم ووډ، ارل انتوني وین، جیمز کننګهم، پي مایکل مک کینلي، هوګو لارنس او راس ویلسن لخوا لاسلیک شوی دی.</p>
<p style="text-align: justify;">سرچینې زیاته کړې، یاد لیک چې د افغانانو د تخلیې پروګرام (AfghanEvac) بنسټګر شان وینډیور او د متحده ایالتونو پخواني سفیر فل کاسنیټ له خوا چمتو شوی، د افغانستان د کارپوهانو پیغام دی چې د افغانانو پر وړاندې د متحده ایالتونو د ژمنو پرځایښت لپاره په عمومي بودجه کې د دې طرحې شاملول اړین ګڼي.</p>
<img class="aligncenter wp-image-505414 " src="https://pajhwok.com/wp-content/uploads/2022/12/Fd2tTQaXoHwsI_o.jpg" alt="" width="504" height="378" />
<p style="text-align: justify;">له دې وړاندې، د امریکا د مشرانو جرګې غړې جین شهین او یو شمېر نورو امریکايي قانونجوړوونکو هم له دغه پلان څخه خپل ملاتړ اعلان کړی و.</p>
<p style="text-align: justify;">مېرمن شهین د امریکا په کانګرس کې د ښځو او د امریکايي ځواکونو د افغان ژباړونکو د حقونو یوه فعاله ملاتړې ګڼل کېږي.</p>
<p style="text-align: justify;">د امریکا کانګرس د سهشنبې په ماښام اعلان وکړ چې د عمومي بودجې په اړه یوې موافقې ته رسېدلي او قانونجوړوونکي به په څو راتلونکو ورځو کې د تصویب لپاره یوه مسوده چمتو کړي. خو د دغې بودجې د جزیاتو او دا چې د افغانانو د مېشتېدو طرحه پکې شامله ده که نه، څه نه دي ویلي.</p>
<p style="text-align: justify;">کانګرېس ته په لېږل شوي لیک کې استدلال شوی چې که امریکا ته د تازه راغلو افغانانو د کېسونو پروسس او بیامېشتیدنې پلان د دغه هېواد په بودجه کې شامل نه شي، د پناهغوښتنې او مهاجرت محکمو سیستم به د هغو زرګونو افغانانو د غوښتنلیکونو د پروسس توان ونه لري کوم چې د ۲۰۲۱ کال له اګست راهیسې د تخلیې په بهیر کې متحده ایالتونو ته راغلي او موقتي بشردوستانه اوسېدنې (Humanitarian Parole) موده یې پای ته رسېږي.</p>
<p style="text-align: justify;">امریکا ته د نوو راغلو افغانانو د کېسونو پروسس او بیامېشتېدنې طرحه د موقتي بشردوستانه اوسېدنې له مخې امریکا ته راغلو افغانانو ته د دې حق ورکوي چې له اضافي پړاوونو پرته، په متحده ایالتونو کې د دایمي استوګنې یا ګرینکارت غوښتنه وکړي.</p>
<p style="text-align: justify;">اوسمهال، امریکا ته تازه راغلي افغانان کولای شي یوازې د مهاجرت ځانګړې ویزې (SIV) له لارې په امریکا کې د دایمي استوګنې غوښتنه وکړي.</p>
<p style="text-align: justify;">پخوانیو سفیرانو په دغه لیک کې استدلال کړی چې که امریکا د نوو راغلو افغانانو د پروسس او بیامېشتېدنې د طرحې تصویب په برخه کې عمل ونه کړي او د خپلو افغان متحدینو ملاتړ و نه کړي، پر امریکا باور به زیانمن شي.</p>
<p style="text-align: justify;">په لیک کې ویل شوي: «که د امریکا متحدین وویني چې زموږ افغان همکاران یوازې پرېښودل شول، نو دوی به په راتلونکي کې د متحده ایالتونو له ماموریتونو سره مرستې ته ډېر لږ زړه ښه کړي.»</p>
<p style="text-align: justify;">د امریکا ولسي جرګې د یوې اونۍ موقته بودجه د چهارشنبې په ورځ تصویب کړه او مشرانو جرګې ته یې ولېږله چې ټاکل شوې په راتلونکو څو ورځو کې تصویب شي.</p>
<p style="text-align: justify;">دا په داسې حال کې ده چې له تېرو څو میاشتو راهیسې یو شمېر افغانانو او امریکایانو په واشنګټن کې د امریکا د کانګرېس مخې ته پرلت وهلی او له وکیلانو غواړي چې دا طرحه پاس کړي.</p>
<p style="text-align: justify;">[/restrict]</p>
