[restrict paid=”true”]
اټلانټا (پژواک، ۳ مرغومی ۱۴۰۱): د ارشاد، حج او اوقافو وزارت وایي چې بالغې نجونې یوازې د کابل ښار د جوماتونو مدرسو ته له ورتلو منع شوې دي.
د دغه وزارت له خوا د مرغومي په ۳مه په خپره شوې یوه خبرپاڼه کې راغلي چې د جوماتونو او حسینیو چارو انسجام عمومي ریاست له خوا یوازې د کابل ښار په هغو جوماتونو کې چې د بالغو نجونو مدرسې په کې وي، د نه ورتلو حکم شوی.
سرچینې زیاته کړې، د هغو ښځینه دیني مدارسو په اړه چې په جوماتونو کې نه دي، هیڅ نه دي ویل شوي.
له دې مخکې د لوړو زدهکړو وزارت د لېندۍ په ۲۹مه اعلان وکړ چې په هېواد کې د نجونو لوړې زدهکړې تر بل امر پورې وځنډول شوې.
د وزارت په خبرتیا کې راغلي: «د هېواد ټولو دولتي او خصوصي پوهنتونونو ته خبر ورکول کېږي چې د ۱۴۴۳ هجري قمري کال د کابینې ۲۸مې ګڼې مصوبې پرېکړې له مخې، د اناثو تحصیل هم تر امر ثاني پورې معطل شو.»
دا په داسې حال کې ده چې د کابل ښار په ښوونیزو کورسونو کې هم د مسوولینو د امر پر اساس د نجونو زدهکړې بهیر ډول ځنډول شوي دي.
د افغانستان د سرپرست حکومت یادې پرېکړې په ملي او نړۍواله کچه غندل شوې دي؛ د ملګرو ملتونو او ګڼ شمېر هېوادونو ترڅنګ د اسلامي همکاریو سازمان او د ازهر مشر هم له دغه کار سره مخالفت څرګند کړی دی.
[/restrict]
Views: 444
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن