مجاهد: مزارشریف کې د ځانګړو ځواکونو عملیاتو کې یو شمېر داعشیان وژل شوي

[restrict paid="true"]

اټلانټا (پژواک، ۲۷ کب ۱۴۰۱): د اسلامي امارت ویاند ذبیح‌الله مجاهد وایي چې د بلخ د مرکز مزارشریف ښار په درېیو ساحو کې د داعش پر ضد عملیات ترسره شوي دي.

مجاهد د کب په ۲۷مه سهار وخته پر ټویټر لیکلي چې دغه عملیات د ځانګړو ځواکونو له خوا تېره شپه د مزارشریف ښار په پنځمه، شپږمه او اتمه ناحیو کې وشول.

هغه زیاته کړې: «د خوارجو پر دریېو پټنځایونو ځپونکي عمليات شوي؛ ګڼ شمېر داعشي خوارج وژل شوي، وسلې او مهمات یې نیول شوي، يو مجاهد هم زخمي شوی دی.»

نوموړي په دې اړه نور جزئیات نه دي ورکړي.

بلخوا ځینو کسانو په ټولنیزو شبکو کې لیکلي چې دا عملیات د مزارشریف په دشت شور سیمه کې شوي او ټوله شپه د ډزو غږونه اورېدل کېدل.

د یادونې ده، څو ورځې مخکې هم په مزارشریف کې د عملیاتو پر مهال د اتو داعشیانو وژل کېدو خبر ورکړل شوی و، خو بیا د وژل شوو کسانو کورنیو په کابل کې لاریون وکړ او ادعا یې کوله چې وژل شوي کسان عادي ځوانان وو.

[/restrict]