کندهار (پژواک، ۱۷ وری ۱۴۰۱): د کندهار ښار د لومړۍ حوزې اړوند خرقې شريفې ته څېرمه تېره شپه پر نشهیي توکو یوه روږدي کس خپله مېرمن وژلې او وروسته له کوره تښتېدلی دی.
د کندهار سیمهییز مسوولین دغه پېښه تاييدوي او وايي چې پېښه د کورني تاوتريخوالي له امله رامنځته شوې او په اړه يې پلټنې روانې دي.
د کندهار ولايت مقام مطبوعاتي دفتر مسوول حاجي زيد د پنجشنبې په ورځ پژواک خبري اژانس ته وويل، دغه کس وحيدالله نومېږي او تېره شپه يې خپله مېرمن زندۍ کړې او وژلې ده.
هغه زياته کړه: «دغه نشهيي کس تېره شپه خپله مېرمن زندۍ او وژلې ده او دی تښتېدلی دی، پېښه د کورني جنجال له امله رامنځته شوې ده.»
د سيمي اوسېدونکي هم وايي چې دغه کس پر نشهیي توکو روږدی و او ډېری وخت به يې په کور کې جنجالونه او شخړې کولې.
د لومړۍ ناحيې يو اوسېدونکی سیدالله وايي، وحيدالله بېروزګاره او پر نشهیي توکو هم روږدی و، نو پيسې به يې د کورنۍ له نورو غړو څخه اخيستلې.
د هغه په وينا، ښايي له مېرمنې سره یې د پیسو پر سر ستونزه رامنځته شوې او وروسته یې هغه وژلې وي.
نوموړي زیاته کړه: «دغه کس نشه يي و نو کار يې هم نه کاوه، پرون يې په کور کې جنجال کړی و، بیا يې د شپې خپله مېرمن وژلې وه.»
د یادونې وړ ده چې په کندهار کې تر دې مخکې هم ورته پېښې رامنځته شوې چې لامل یې هم ډېره کورنۍ ستونزې بلل شوې دي.
GET IN TOUCH
NEWSLETTER
SUGGEST A STORY
PAJHWOK MOBILE APP