کابل کې د تېرو اوو ورځو په نسبت د قزاقي اوړو بیه لوړه شوې ده

کابل (پژواک، ۱۷ چنګاښ ۱۴۰۲): په کابل ښار کې نن د اوو ورځو مخکې په نسبت د قزاقي اوړو بیه یو څه لوړه شوې خو د نورو لومړنیو توکو بیو کې کوم بدلون نه دی راغلی.

په کابل ښار کې د خوراکي توکو اتحادیې رییس زمري صافي وویل چې د تېرو ۷ ورځو په پرتله نن په عمده ډول د ۴۹ کیلوګرامه قزاقي اوړو بیه له ۱۵۵۰ څخه ۱۶۰۰ افغانیو ته لوړه شوې ده.

د هغه په خبره، د اوړو بیه د قزاقستان په بازارونو کې لوړه شوې چې له امله یې د کابل ښار په بازارونو کې هم لوړه شوې ده.

خو نوموړی وايي، نن هم لکه د تېرو اوو ورځو په څېر په عمده ډول ۴۹ کیلوګرامه هندي بوره په ۳۵۵۰ افغانۍ، ۲۴.۵ کیلوګرامه لومړۍ سېله پاکستاني وریجې په ۳۰۰۰ افغانۍ، ۱۶ لېتره مالیزیايي غوړي په ۱۷۰۰ افغانۍ، یو کیلوګرام افریقایي تور چای په ۴۰۰ افغانۍ او یو کیلوګرام اندونیزیایي شین چای په ۳۵۰ افغانۍ پلورل کېږي.

د یو شمېر توکو پرچون بیه د هغو له عمده بیو سره په ځینو مواردو کې ډېره او په ځینو کې بیا لږ توپیر لري.

د کابل ښار په دهن‌باغ سیمه کې د خوراکي توکو پرچون پلورونکي حامد صوفي‌زاده وویل، نن په پرچون ډول ۴۹ کیلوګرامه قزاقي اوړه په ۱۶۵۰ افغانۍ، ۲۴ کیلوګرامه لومړۍ سېله پاکستانۍ وریجې په ۳۰۵۰ افغانۍ، ۴۹ کیلوګرامه هندۍ بوره په ۳۶۰۰ افغانۍ، ۱۶ لېتره مالیزیايي غوړي په ۱۷۵۰ افغانۍ، یو کیلوګرام اندونیزیایي شین چای په ۴۰۰ افغانۍ او یو کیلوګرام افریقایي تور چای په ۴۵۰ افغانۍ پلورل کېږي.

د نفتي توکو بیو کې بدلون نه دی راغلی.

د «احمدیار ګروپ» تېلو ټانک یوه کارکوونکي پژواک خبري اژانس ته وویل، د یو لېتر پټرولو بیه ۶۴ افغانۍ او د یو لېتر ډېزلو بیه ۶۳ افغانۍ ده.

دغه‌راز د کابل ښار په کلوله‌پشته سیمه کې یو ګاز پلورونکی محمدشریف وايي، نن د تېرې اونۍ په څېر، یو کیلوګرام ګاز په ۵۶ افغانۍ پلوري.

د سرو زرو بیو کې هم بدلون نه دی راغلی.

د کابل ښار پر تیمورشاهي سړک د حاجي حامد صالح‌زاده زرګرۍ مالک محمدفواد وویل چې نن هم د تېرې اونۍ په څېر د یو ګرام ۷۵۰ عیار عربي سرو زرو بیه ۴۴۰۰ او د یو ګرام  ٥٨٥ عیار روسي سرو زرو بیه ۳۴۵۰ افغانۍ ده.

د سرو زرو پلورونکو په خبره، په کابل ښار کې د سرو زرو بیو بدلون په نړۍوالو بازارونو کې د هغو د بیو له بدلون سره تړاو لري.

د کابل ښار په شهزاده سرای کې د «صداقت» صرافۍ مالک حاجي حسین وویل چې نن د یو امریکايي ډالر د پېر بیه ۸۶.۳۰ افغانۍ ده او زر پاکستانۍ کلدارې په ۳۰۰ افغانیو بدلېږي.

دا په داسې حال کې ده چې د چنګاښ په ۱۰مه یو امریکايي ډالر په ۸۶ افغانۍ او زر پاکستانۍ کلدارې په ۲۸۰ افغانۍ تبادله کېدې.