اسیایي لوبې؛ افغان الف لوبډله نن له هندوستان سره پای‌لوبه کوي

کابل (پژواک، ۱۵ تله ۱۴۰۲): د افغانستان کرکټ الف لوبډله د چین په اسیایي لوبو کې نن له هندوستان سره پای‌لوبه ترسره کوي.

افغان کرکټ الف لوبډلې د چین په اسیایي لوبو کې سریلانکا او پاکستان ته په ماتې ورکولو سره په دغو سیالیو کې پای‌لوبې ته لار پیدا کړه.

د افغانستان کرکټ بورډ پر خپله فیسبوک‌پاڼه لیکلي، افغان ابدالیان (الف لوبډله) نن د افغانستان پرمهال له غرمې مخکې لس نیمې بجې د چین په اسیایي لوبو کې له هندوستان سره پای‌لوبه ترسره کوي.

د یادونې ده، د افغانستان الف لوبډله به له دې سیالیو وروسته عمان ته لاړه شي او هلته به له کوربه هېواد سره دوه یو ورځنۍ او پنځه شل اوریزه لوبې ترسره کړي.