دوو ولایتونو کې تر ۱۶۸۰۰ ډېرو کورنیو او کروندګرو سره مرسته وشوه

کابل (پژواک، ۲۵ لړم ۱۴۰۲): مسوولینو په کندهار کې ۱۶زره کروندګرو ته د غنمو اصلاح شوو تخمونو او کیمیاوي سرې د وېش لړۍ پیلېدو او ننګرهار کې پر ۸۰۹ اړمنو کورنیو د خوراکي توکو د وېشلو خبری ورکړی دی.

د کندهار د کرنې او مالدارۍ رييس مولوي محمود مظلوم وايي چې د دغه ولايت د شپږو ولسواليو پر شپاړس زره کروندګرو د غنمو د اصلاح شوو تخمونو او کيمياوي سرې د وېشلو لړۍ نن له دامان ولسوالۍ څخه پيل شوه.

 هغه زیاته کړه چې دا اصلاح شوي تخمونه د خوړو او کرنې نړۍوال سازمان په مالي مرسته کروندګرو ته وېشل کیږي.

د سرچینې د معلوماتو له مخې، هر کروندګر ته ۵۰ کیلوګرامه د غنمو اصلاح شوي تخمونه، ۵۰ کیلوګرامه توره او ۵۰ کیلوګرامه سپینه کیمیاوي سره ورکول کیږي.

د ننګرهار د کلیو د پراختیا او بیارغونې رییس مولوي قسمت‌الله مبارز وایي چې د خوړو نړۍوال پروګرام په مرسته او د یاد ریاست په همکارۍ یې د دغه ولایت د نازیانو ولسوالۍ له ۸۰۹  اړمنو کورنیو سره مرسته وکړه.

هغه وویل چې هرې کورنې ته ۵۰ کیلوګرامه اوړه، پنځه لېتره غوړي، د ماشومانو د خوارځواکۍ د مخنیونې په موخه ۳۲ پاکټه مواد او څه د پاسه ۶ کیلو دال ورکړل شوي دي.