حماس ډله: اسرائیل له اوربنده سرغړونه کړې، د بندیانو خوشي کول مو ځنډولي

[restrict paid="true"]

اټلانټا (پژواک، ۴ لېندۍ ۱۴۰۲): د فلسطین حماس ډلې د بندیانو خوشي کول ځنډولي او ویلي یې دي چې اسرائیلي ځواکونو له څلور ورځني موقت اوربنده سرغړونه کړې ده.

دغه اوربند چې د امریکا، قطر او مصر په منځګړیتوب له څو ورځو خبرو اترو وروسته پرون سهار پیل شوی و، په لومړۍ مرحله کې حماس ۲۴ اسرائیلي او ټایلینډي بندیان او اسرائیل ۳۹ فلسطیني بندیان خوشي کړل.

خو د حماس ډلې د لېندۍ په ۴مه وویل، اسرائیلي ځواکونو په بېلابېلو سیمو کې پر روغتیایي ډلو بریدونه کړي او له اوربنده یې سرغړونه کړې ده چې له امله یې دوی د یرغمل کسانو خوشي کول ځنډولي دي.

خو اسرائیل د اوربند له موافقې سرغړونه رد کړې او ژمنه یې کړې چې د لنډمهال اوربند له پای ته رسېدو وروسته به د حماس د له منځه وړو لپاره جګړې ته دوام ورکړي.

د اسرائیل لوی درستیز هرتزي هالوي ویلي: «د اوربند په پای کې به سمدستي پر غزه بریدونه پیل کړو.»

د تېرې اکتوبر میاشتې له اوومې د حماس او اسرائیل ترمنځ جګړه روانه ده؛ په دې موده کې شاوخوا ۱۴ زره فلسطینیانو ژوند له لاسه ورکړل او زرګونه نور ژوبل شوي دي.

دغه راز د راپورونو له مخې، په جګړو کې تر اوسه ۱۵۰۰ اسرائیلیان هم وژل شوي او زرګونه نور ژوبل شوي وو.

تېره میاشت کله چې حماس اسرائیل ته ننوتل او جګړه یې پیل کړه، نو شاوخوا ۲۵۰ اسرائیلیان یې له ځان سره ژوندي هم وړي وو.

[/restrict]