کابل (پژواک، ۵ مرغومی ۱۴۰۲): هېواد ته د «فلای دوبی» هوايي شرکت د الوتنو له پیل وروسته «ایر عریبه» هوايي شرکت هم خبر ورکړی چې د جنورۍ په لسمه به د کابل او شارجې ترمنځ خپلې لومړنۍ دوه اړخیزې الوتنې پیلوي.
د افغانستان ملي راډیو او ټلوېزیون نن (سهشنبه) په دوبۍ کې د اسلامي امارت د قونسلګرۍ په حواله دا راپور ورکړی دی.
ایر عرییه هوايي شرکت چې په افغانستان کې د اسلامي امارت له واکمنېدو وروسته یې کابل ته خپلې الوتنې ځنډولې وې، اوس یې ویلي چې د راتلونکي کال د جنورۍ له لسمې به بېرته خپلې الوتنې افغانستان ته پیل کړي.
دا په داسې حال کې ده چې له دې مخکې فلای دوبی هوايي شرکت له دوه کاله او څو میاشتو ځنډ وروسته د نومبر په ۱۵ کابل ته خپلې الوتنې له سره پیل کړې.
د يادونې ده چې د تېر جمهوري نظام له پرځېدو وروسته يو شمېر هوايي شرکتونو افغانستان ته کې خپلې الوتنې درولې دي.
خو د اسلامي امارت چارواکو له دې مخکې ویلي چې د افغانستان هوايي حریم د هر ډول الوتنو لپاره خوندي دی او د هېواد په ټولو هوايي ډګرونو کې معیاري خدمتونه وړاندې کېږي.
عبدالله عزیزی
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن