<p style="text-align: justify;">کابل (پژواک، ۵ مرغومی ۱۴۰۲): هېواد ته د «فلای دوبی» هوايي شرکت د الوتنو له پیل وروسته «ایر عریبه» هوايي شرکت هم خبر ورکړی چې د جنورۍ په لسمه به د کابل او شارجې ترمنځ خپلې لومړنۍ دوه اړخیزې الوتنې پیلوي.</p>
<p style="text-align: justify;">د افغانستان ملي راډیو او ټلوېزیون نن (سهشنبه) په دوبۍ کې د اسلامي امارت د قونسلګرۍ په حواله دا <strong><a href="https://twitter.com/rtaenglish1/status/1739268627507909066">راپور</a> </strong>ورکړی دی.</p>
<p style="text-align: justify;">ایر عرییه هوايي شرکت چې په افغانستان کې د اسلامي امارت له واکمنېدو وروسته یې کابل ته خپلې الوتنې ځنډولې وې، اوس یې ویلي چې د راتلونکي کال د جنورۍ له لسمې به بېرته خپلې الوتنې افغانستان ته پیل کړي.</p>
<p style="text-align: justify;">دا په داسې حال کې ده چې له دې مخکې فلای دوبی هوايي شرکت له دوه کاله او څو میاشتو ځنډ وروسته د نومبر په ۱۵ کابل ته خپلې الوتنې له سره پیل کړې.</p>
<p style="text-align: justify;">د يادونې ده چې د تېر جمهوري نظام له پرځېدو وروسته يو شمېر هوايي شرکتونو افغانستان ته کې خپلې الوتنې درولې دي.</p>
<p style="text-align: justify;">خو د اسلامي امارت چارواکو له دې مخکې ویلي چې د افغانستان هوايي حریم د هر ډول الوتنو لپاره خوندي دی او د هېواد په ټولو هوايي ډګرونو کې معیاري خدمتونه وړاندې کېږي.</p>
<p style="text-align: justify;">عبدالله عزیزی</p>
