<p style="text-align: justify;">فراه ښار (پژواک، ۱۳ کب ۱۴۰۲): فراه کې امنیتي مسوولین وايي چې په دغه ولایت کې یې یو ځل بیا پر نشهیي توکو د روږدو کسانو ټولولو کمپاین پيل کړی دی.</p>
<p style="text-align: justify;">د فراه د امنیې قوماندانۍ د امنیت امر مولوي محمدنسیم جهادمل پژواک خبري اژانس ته وویل چې نن سهار یو ځل بیا په فراه ښار او ولسوالیو کې پر نشهیي توکو د روږدو کسانو ټولولو کمپاین پيل شوی دی.</p>
<p style="text-align: justify;">هغه وویل چې په دغه کمپاین کې تر اوسه له ۱۰۰ تر ۱۵۰ پورې پر نشهيي توکو اخته کسان نیول شوي دي.</p>
<p style="text-align: justify;">نوموړی وايي چې د دغو کسانو د درملنې لپاره ځانګړی ځای جوړ شوی او تر هغه په کې ساتل کېږي چې روغتیايي حالت یې ښه شي.</p>
<p style="text-align: justify;">ورته وخت کې د فراه د امنیې قوماندانۍ ویاند مولوي محمدنسیم بدري پژواک ته وویل چې دغه کمپاین تر هغې دوام کوي څو له ښار او ولسوالیو ټول معتادین راټول شي.</p>
<p style="text-align: justify;">بل لور ته، خلک هم د حکومتي مسوولینو د دغه اقدام ستاینه کوي.</p>
<p style="text-align: justify;">د فراه یوه اوسېدونکي ګلاحمد پژواک ته وویل چې پر نشهيي توکو د روږدو کسانو ټولول او د هغوی درملنه یو نیک او پر ځای کار دی.</p>
<p style="text-align: justify;">نوموړي ټینګار وکړ چې دغه کسان باید تر هغې وساتل شي څو يې په سمه توګه درملنه نه وي شوې.</p>
<p style="text-align: justify;">په فراه ښار کې پر نشهيي توکو یوه روږدي ابراهیم پژواک ته وویل چې له تېرو لسو کلونو راهیسې نشهيي توکي استعمالوي.</p>
<p style="text-align: justify;">هغه وايي، که دا ځل یې درملنه وشي نور به هیڅکله هم نشهيي توکي استعمال نه کړي.</p>
<p style="text-align: justify;">د یادونې ده، له دې مخکې پلازمینې کابل او نورو ولایتونو کې هم پر نشهیي توکو د روږدو کسانو د ټولولو کمپاینونه ترسره شوي دي.</p>
