فراه کې ۳۶۰۰ کیلوګرامه نشه‌يي توکي کشف او له منځه وړل شوي

<p style="text-align: justify;">فراه‌ښار (پژواک، ۲ وری ۱۴۰۲): د فراه امنیه قومانداني وايي چې په بکوا ولسوالۍ کې ۳۶۰۰ کیلوګرامه بېلابېل نشه‌يي توکي کشف او له منځه وړل شوي دي.</p>

<p style="text-align: justify;">دغه څرګندونې په هغې خبرپاڼې کې شوې چې نن د فراه امنيې قوماندانۍ له لوري رسنیو ته استول شوې ده.</p>

<p style="text-align: justify;">خبرپاڼه کې راغلي چې د امنیې قوماندانۍ له نشه‌يي توکو سره د مبارزې مدیریت پولیسو د یو لړ عملیاتو په ترڅ کې د بکوا ولسوالۍ په شاګي او چګیدي سیمو کې ۳۶۰۰ نشه‌يي توکي کشف او ترلاسه کړي دي.</p>

<p style="text-align: justify;">سرچینه وايي چې پولیسو ترلاسه شوي یاد نشه‌يي توکي په سیمه کې سوځولي دي.</p>

<p style="text-align: justify;">خبرپاڼې د یادو توکو نوعیت په اړه جزئيات نه دي ورکړي.</p>

<p style="text-align: justify;">سرچینه کې دغه راز راغلي چې په یادو سیمو کې څلور جریبه کوکنارو هم اړول شوي او په تړاو یې ۷ کسان نیول شوي دي.</p>