[restrict paid="true"]
ګردېز (پژواک، ۴ وری ۱۴۰۳): د پکتيا امنیې قوماندانۍ مسوولين وايي چې د دغه ولایت د مرکز ګردېز ښار دويمې امنيتي حوزې مربوطاتو کې په ترافيکي پېښه کې د يوې کورنی څلورو غړو ته مرګژوبله اوښتې ده.
د امنيې قومانداني وياند منيب ځدراڼ پژواک خبري اژانس ته وويل چې دا پېښه نن له غرمې وروسته د کابل -ګردیز پر عمومي سړک شوې ده.
ځدراڼ زياته کړه، يو الټو موټر د ډېر سرعت له امله له سړکه وتلی او د برېښنا له پايې سره لګېدلی دی.
د هغه په وینا، په دې پېښه کې د یوې کورنۍ یو کس مړ او درې کسان چې په کې مور او دوه لوڼې یې دي، ټپیانې شوې دي.
ده وویل، چې ټپیان روغتون ته لېږدول شوي خو د هغوی روغتیایي وضعیت په اړه یې معلومات نه درلودل.
پرون په بدخشان ولایت کې هم د یوې ترافیکي پېښې له امله اته کسان مړه شوي وو.
د یادونې ده چې په دې وروستیو کې د هېواد په بېلابېلو سیمو کې ترافیکي پېښې زیاتې شوې دي، د پژواک راپورونو له مخې د ۱۴۰۲ کال پر مهال په ټول هېواد کې د ترافیکي پېښو له امله شاوخوا پنځه زر کسانو ته مرګژوبله اوښتې ده.
[/restrict]
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن