<p style="text-align: justify;">مهترلام (پژواک، ۲۸ غبرګولی ۱۴۰۳): د لغمان د بادپښ ولسوالۍ اوسېدونکي شکایت کوي چې د ولسوالي په کچه هیڅ بازار نهلري او اړ دي چې د خپلو لومړنیو اړتیا وړ توکو پسې مهترلام ښار ته ساعتونه مزل وکړي.</p>
<p style="text-align: justify;">د لغمان د بادپښ ولسوالۍ اړوند د شاهګلیانو سیمې قومي مشر ملک زیارتګل پژواک خبري اژانس ته وویل، ټوله ولسوالۍ کې یوازې دوه محلي دوکانونه لري چې په ډېره کمه اندازه خوراکي توکي پهکې پلورل کېږي.</p>
<p style="text-align: justify;">نوموړي وویل: «ټول خوراکي او غیرخوراکی توکو پسې مهترلام ښار ته ځو، د موټر له کرایې سره راته هر جنس له اصلي قیمت څخه دوه برابره ګران تمامیږي.»</p>
<p style="text-align: justify;">هغه زیاته کړه، په بادپښ کې د اندروړ درې، سنځلې درې، ګړوچ درې، شاه ګلیان درې، حسنزیي درې او بادپښ درې په نوم شپږ درې دي چې شاوخوا ۱۲ زره کورنۍ پهکې ژوند کوي.</p>
<p style="text-align: justify;">ورته مهال، د سنځلۍ درې قومي مشر ملک محمدخان هم وايي، دې دره کې نږدې ۱۰۰۰ کورنۍ ژوند کوي چې د بازار نشتون له امله میاشت کې یو ځل د اړتیا وړ توکو پسې مهترلام ښار ته ځي.</p>
<p style="text-align: justify;">دوی وایي، که حکومت دې ولسوالۍ کې ځانګړی بازار او مارکېټونه جوړ کړي، هم به د دې ولسوالۍ د خلکو ستونزې کمې شي او هم به دولت ته د عوایدو ښه سرچینه شي.</p>
<p style="text-align: justify;">ورته مهال، د دغه ولایت د کور او ښار جوړونې ریاست مسوولین، د بادپښ ولسوالۍ د اوسېدونکو ستونزې مني او د حل په اړه یې ډاډ ورکوي.</p>
<p style="text-align: justify;">د یاد ریاست رییس مولوي حسیناحمد تیلوي وايي، د دې ولسوالۍ د اوسېدونکو د بازار نشتون ستونزه ور رسېدلې او هڅه کوي چې له ولایتي ادارې سره په همغږۍ ورته رسېدنه وکړي.</p>
<p style="text-align: justify;">هغه وویل، د لغمان ټولو ولسوالیو لپاره پر داسې پلان کار کوي چې د ښارګوټو او مارکېټونو تر څنګ تفریحي پارکونو، کلینکونو، د لوبو میدانونو او شنو سیمو لپاره پهکې سیمې په نښه او په راتلونکې کې ورباندې کار پیل کړي.</p>
<p style="text-align: justify;">پادپښ د لغمان په لوېدیځ کې پرته غرهییزه ولسوالي ده چې مسوولین یې وايي، په شپږو درو کې شاوخوا ۷۰ لوی او واړه کلي لري چې ۶۰ زره کسان پهکې ژوند کوي.</p>
