<p style="text-align: justify;">کابل (پژواک، ۳ چنګاښ ۱۴۰۳): د افغانستان د ازادو مبارزاتو ورزشکار نصرت حقپرست خپل امریکايي سیال جرد ګورډون، ته ماتې ورکړه.</p>
<p style="text-align: justify;">دغه سیالي تېره شپه د سعوديعربستان په ریاض ښار کې (د وروستۍ اتلولۍ مبارزه (UFC په سازمان کې ترسره شوه.</p>
<p style="text-align: justify;">حقپرست وتوانېد چې د خپل پیاوړي امریکایي سیال پر وړاندې د ارزوونکو د نمرو په توپیر دغه سیالي وګټي.</p>
<p style="text-align: justify;">دا په ازادو سیالیو کې له مسلکي کېدو را په دېخوا د حقپرست ۱۷مه بریا ده.</p>
<p style="text-align: justify;">حقپرست دا مهال د نړۍ په کچه ۲۶م مقام او ټولټال ۲۲ مسلکي ریکارډونه لري چې په دغو سیالیو کې یوازې پنځه ځله له ماتې سره مخ شوی دی.</p>
