<p style="text-align: justify;">مزارشریف (پژواک، ۹ چنګاښ ۱۴۰۳): د بلخ د کرنې، اوبو لګولو او مالدارۍ رياست وایي، سږ کال په دغه ولایت کې د شفتالو حاصلات شاوخوا څلور زره ټنو پورې اټکل شوي چې د تېر کال په پرتله دوه برابره ډېروالی ښیي.</p>
<p style="text-align: justify;">د بلخ کرنې، اوبو لګولو او مالدارۍ ریاست د ترویج مدیر محمدحسین عظیمي پژواک خبري اژانس ته وويل، د دغه ولايت په دولتآباد، بلخ، شولګره، چهاربولک، دهدادي او نهرشاهي ولسواليو کې پر ۵۰۰ هکټار ځمکه د شفتالو بڼونه جوړ شوي دي.</p>
<p style="text-align: justify;">د نوموړي د معلوماتو له مخې، تېر کال له هر هکټار بڼ څخه لږ تر لږه څلور ټنه حاصل راټولیده خو سږ کال د بارانونو ورښت او مناسبې هوا له امله به د دغو حاصلاتو کچه له ۷ تر ۸ ټنو پورې ورسېږي.</p>
<p style="text-align: justify;">هغه زیاتوي چې د دغه ریاست د اټکل له مخې، سږ کال به په ټوله کې له ۵۰۰ هکټاره بڼونو څخه شاوخوا ۴ زره ټنه د شفتالو حاصلات راټول شي.</p>
<p style="text-align: justify;">په همدې حال کې د یاد ریاست د تحقیقاتي فارم مدیر عبدالعزیز سلطاني وایي چې د بلخ هوا او اوبه د هر ډول شفتالو لپاره مناسب دي او دا مهال بلخ کې ۱۲ ډوله د شفتالو ونې شتون لري چې د مایکریست، شلیل، قیسي، جورس، فلاور او فلایز په نومونو یادېږي.</p>
<p style="text-align: justify;">که څه هم د شفتالو د حاصلاتو ډېروالي په بڼوالو کې هیلهمندي ډېره کړې خو بیا هم د ملاتړ غوښتنه کوي.</p>
<p style="text-align: justify;">دغه باغ لرونکي وايي، د کرنیزو حاصلاتو زیاتوالي په موخه د کرنې ریاست باید له نورو بنسټونو سره په همغږۍ د کیمیاوي سرې او درملو وېش لړۍ پیل کړي.</p>
<p style="text-align: justify;">د دهدادي ولسوالۍ یو بڼوال فیضالله وایي، له لسو کلونو راهیسې پر بڼوالۍ بوخت دی او سږ کال د شفتالو له حاصلاتو راضي دی.</p>
<p style="text-align: justify;">نوموړی زیاتوي، سږ کال موسمي بارانونه او مناسبه هوا د دې لامل شوي چې د شفتالو حاصلات ډېر شي.</p>
<p style="text-align: justify;">نوموړي له حکومته غوښتنه وکړه چې له دوی سره دې د کیمیاوي سرې او درملو برخه کې مرسته وکړي څو راتلونکي کال ته یې حاصلات تر دې هم ډېر شي.</p>
<p style="text-align: justify;">محمدبشیر چې په دهدادي ولسوالۍ کې پر دوه جریب ځمکه د شفتالو بڼ لري، وايي چې د تېر کال په پرتله یې سږ کال حاصلات ښه دي خو له حکومته د ملاتړ غوښتنه کوي.</p>
<p style="text-align: justify;">نوموړی زياتوي: «حکومت دې د بازارموندنې ترڅنګ د شفتالو ساتلو لپاره سړې خونې جوړې کړي او همداراز دې د حاصلاتو ټولولو، ساتلو او بستهبندۍ په موخه لازمې اسانتیاوې برابرې کړي.»</p>
<p style="text-align: justify;">د یادونې ده چې دا مهال د بلخ ولایت په بلخ، چهاربولک، چمتال، شولګره، دهدادي، دولتآباد او نهرشاهي ولسوالیو کې د زردالو ۱۲ ډوله ونې هم شته چې د هېواد له نورو ولایتونو څخه د ترویج په موخه راوړل شوې دي.</p>
