کابل (پژواک، ۱۸ چنګاښ ۱۴۰۳): د مالیې وزارت وایي، په دولتي ادارو کې به ټولې ښځینه کارکوونکې د پخوا په څېر خپل معاشونه ترلاسه کوي او یوازې هغو ښځینه کارکوونکو ته به پنځه زره افغانۍ ورکول کېږي چې په کور ناستې دي.
د چارو ادارې د روان کال د غبرګولي په څلورمه د چاپېریالساتنې ملي ادارې ته په یوه مکتوب کې لیکلي وو: «د عالیقدر امیرالمومنین حفظهالله تعالی حکم په لاندې تفصیل صادر شوی: په حکومتي ادارو کې ټولې هغه ښځینه کارکوونکې چې د تېرې ادارې له لوري پر دندو ګومارل شوې او اوس هم د اسلامي امارت له لوري معاشونه ورته اجرا کېږي، د هغوی ټولو معاشات دې په بودجوي او غیربودجوي واحدونو کې پنځه زره افغانۍ تعیین شي (د ټولو د معاشونو مقدار دې یو شي).»
وروسته له هغه په ټولنیزو پاڼو کې یو بل مکتوب هم خپور شو چې ماليې وزارت لیکلي، د ښځینه کارکوونکو د معاشونو په اړه دې د یاد حکم له مخې اصولي اقدام وشي.
د چنګاښ په یوولسمه یو شمېر ښځینه دولتي کارکوونکو پژواک خبري اژانس سره په خبرو کې ویلي وو چې پنځه زره افغانیو ته یې د معاشونو ټیټېدو په اړه څرګندونو ډېرې اندېښمنې کړې خو هغه مهال یوې سرچينې ویلي وو چې د یاد مکتوب په اړه د مشرتابه له مقامه د وضاحت غوښتنه شوې او د موضوع د حل او روښانه کولو لپاره هڅې روانې دي.
د مالیې وزارت ویاند احمدولي حقمل نن پژواک خبري اژانس ته وویل، یوازې هغو ښځینه کارکوونکو ته پنځه زره افغانۍ معاش ورکول کېږي چې په کور ناستې دي.
هغه وویل، د ښوونکو او ډاکټرانو په ګډون په نورو ټولو دولتي ادارو کې هغه ښځینه کارکوونکې چې خپلو دندو ته ورځي، د پخوا په شان به خپلې تنخواګانې ترلاسه کوي.
Views: 25
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن