کندوز کې یوه کس خپل دوه ماشومان وژلي

کندوز ښار (پژواک، ۶ وږی ۱۴۰۳): د کندوز امنیه قومانداني وايي چې په دغه ولایت کې یوه کس خپل دوه ماشومان وژلي، یو بل ماشوم او مېرمن یې ټپیان کړي دي.

دغه خبر نن د کندوز امنیې قوماندانۍ له لوري پژواک خبري اژانس ته په رالېږلې خبرپاڼه کې ورکړی دی.

سرچینې لیکلي چې د تېرې یکشنبې په شپه د دغه ولایت د چهاردرې ولسوالۍ په ګل‌باغ سیمه کې یوه کس خپل دوه ماشومان د چاقو په وسیله وژلي او بل ماشوم او مېرمن یې ټپیان کړي دي.

په خبرپاڼه کې راغلي چې تورن کس پولیسو نیولی او له لومړنیو څېړنو وروسته به د نورو پلټونو په موخه عدلي او قضايي ارګانونو ته وسپارل شي.

سرچیني لیکلي چې د دې پېښې لامل تر اوسه نه دی معلوم.