ننګرهار کې د دوو دښمنو کورنیو ترمنځ روغه وشوه

جلال‌اباد (پژواک، ۱۹ لړم ۱۴۰۳): د ننګرهار په روداتو ولسوالۍ کې د دوو کورنيو ترمنځ ۱۴ کلنه دښمني د حکومتي مسوولینو او قومي مشرانو په منځګړتوب حل او فصل شوه.

مسوولین وايي، دا دښمني د ځمکې پر سر د شخړې له امله رامنځته شوې وه چې دوو کسانو ته مرګ‌ژوبله هم په کې اوښتې وه.

په همدې موخه جوړه شوې غونډه کې د ننګرهار مرستیال والي مولوي عزيزالله مصطفی وويل چې دغه دښمني ۱۴ کاله مخکې د روداتو ولسوالۍ د بړو په سور ډاګ سيمه کې د روح‌الله او قاري خليل کورنيو ترمنځ پیل شوې وه.

هغه زیاته کړه، د دې دښمنۍ په ترڅ کې یو کس وژل شوی او یو بل ټپي و.

ده وویل چې یاده دښمني د حکومتي مسوولینو، قومي مشرانو او دیني عالمانو په منځګړتوب حل او فصل شوه.

نوموړي دغه راز د اسلام مبارک دين له نظره پر روغه جوړه خبرې وکړې او د مسلمانانو ترمنځ يې د سولې او پخلاينې لار غوره کول محبوبه کړنه ياده کړه.

نوموړي يادو کورنيو ته سپارښتنه وکړه چې له پخلاينې وروسته له هر ډول تربګنۍاو مخالفته لرې و اوسي او د جرګې پرېکړې ته ژمن پاتې شي.

د پخلاينې د دې غونډې پر مهال ګڼ شمېر ويناوالو د سولې او پخلاينې پر ګټو خبرې وکړې او پر دې روغې جوړې يې خوښي وښوده.

د دواړو کورنیو غړي هم خوښ دي چې وروسته له یوې اوږدې مودې له دښمنۍ خلاصېږي.

د قاري خلیل کورنۍ یو غړي سرفراز د جرګې له غړو، قومي مشرانو او دیني عالمانو مننه وکړه چې د دوی ترمنځ یې روغه وکړه.

په پای کې د دواړو کورنیو غړو چې وروڼه او ورېرونه دي، يو بل ته غاړې ورکړې او ژمنه یې وکړه چې نور به دښمني نه کوي.