کابل (پژواک، ۲۴ کب ۱۴۰۳): د روسیې ولسمشر وايي چې له اوکراین سره د جګړې درولو له وړاندیزونو سره موافق دی، خو هېواد یې د دې فرضیې پر اساس پر مخ ځي چې اوربند باید دوامداره سولې ته لار هواره کړي او د ناورین اصلي لاملونه لهمنځه یوسي.
د روسیې ولسمشر ولادیمیر پوتین پرون په مسکو کې یوې خبري غونډې ته وویل چې د اصولو پر بنسټ په اوکراین کې د ۳۰ ورځني اوربند په تړاو د امریکا متحده ایالتونو له وړاندیز سره موافق دی، خو د هغه په اړه جدي پوښتنې لري چې باید پر دې طرحه کار وشي او اوربند باید پایدارې سولې ته لار پرانیزي.
د روسیې ولسمشر ویلي: «دا نظریه په خپله سمه ده او موږ یې یقیناً ملاتړ کوو؛ خو داسې موضوعات شته چې موږ یې باید په اړه بحث وکړو، زه فکر کوم چې موږ باید له خپلو امریکایي همکارانو او شریکانو سره پرې بحث وکړو.»
پوتین وویل: «موږ د جګړې د درېدو له وړاندیزونو سره موافق یو، خو موږ د دې فرضیې پر اساس پر مخ ځو چې اوربند باید دوامدارې سولې ته لار هواره کړي او د ناورین اصلي عوامل له منځه یوسي.»
د روسیې ولسمشر زیاته کړې چې له اوکراین سره د اوربند نور اقدامات به له کورسک سرحدي سیمې د اوکرایني ځواکونو په شا کولو کې د روسي ځواکونو د بریالي کېدو پر اساس کوي.
پوتین په یوه خبري کنفرانس کې د روسي سرتېرو د لاستهراوړنو ستاینه کړې او ویلي یې دي: «موږ به د جګړې په ډګر کې د وضعیت د انکشاف پر بنسټ د جګړې د پای ته رسولو او د ټولو د منلو وړ هوکړې ته د رسېدو لپاره له ټولو سره هوکړه وکړو.»
هغه زیاته کړې، داسې ښکاري چې متحده ایالتونو اوکراین هڅولی څو اوربند ومني، خو اوکراین د جګړې په ډګر کې د وضعیت له امله اوربند ته لېوال شوی دی.
هغه وويل: «په دغه وضعیت کې زه باور لرم چې دا به د اوکراینیانو لپاره ښه وي څو لږ تر لږه ۳۰ ورځنی اوربند رامنځته کړي.»
پوتین دغه راز د اوکراین د جګړې پای ته رسولو کې د امریکا له ولسمشر ډونالډ ټرمپ څخه د پاملرنې له امله مننه کړې ده.
دا په داسې حال کې ده چې د اوکراین استازو د تېرې سې شنبې په ورځ (د مارچ ۱۱مه) په سعودي عربستان کې له امریکایي چارواکو سره ناسته کې له روسیې سره د امریکا د وړاندیز شوي (۳۰ ورځني لنډمهاله بېړني اوربند» سره هوکړه وکړه.
GET IN TOUCH
NEWSLETTER
SUGGEST A STORY
PAJHWOK MOBILE APP