ټرمپ: کېدای شي غزه کې د اوربند پرېکړه وشي

کابل (پژواک، ۷ غبرګولی ١٤٠٤): د امریکا ولسمشر ډونالډ ټرمپ تېره ورځ ویلي، غزه کې د اوربند د یوې هوکړې امکان شته او کېدای شي دغه پرېکړه راتلونکې اونۍ وشي.
د بي‌بي‌سي د راپور له مخې، ټرمپ دا څرګندونې په سپینه ماڼۍ کې د کانګو او روانډا ترمنځ د یو تړون د لاسلیک پر مهال کړي دي.
هغه ویلي: “زه فکر کوم د اوربند موکه شته، دا مسله ډېره نږدې شوې ده.”
ده زیاته کړې چې د اسرائیل او حماس ترمنځ د اوربند هڅو اړوندو یو شمېر کسانو سره یې خبرې کړې دي.
ټرمپ د تېرې چهارشنبې په ورځ هم ویلي و چې ځانګړي استازي یې سټیف ویتکوف ورته ویلي، د غزې اوربند ډېر نږدې شوی دی.
د ده په خبره، پر ایران د امریکا هوایي بریدونه کېدای شي د منځني ختیځ پر وضعیت اغېز وکړي “زه فکر کوم ډېر خوشحالوونکي خبرونه به واورو.”