<p style="text-align: justify;">کابل (پژواک، ۴ مرغومی ۱۴۰۴): د اطلاعاتو او فرهنګ وزارت اړوند د توریزم او هوټلدارۍ انسټيټیوټ مسوولین وایي چې په لومړي ځل له دغه انسټیټوټه ۲۷ کسان فارغ شول.</p>
<p style="text-align: justify;">د دغو فارغینو د فراغت مراسم نن (پنجشنبه) په کابل کې د توریزم او هوټلدارۍ په انسټيټیوټ کې ترسره شول.</p>
<p style="text-align: justify;">د توریزم او هوټلدارۍ انسټيټیوټ امر مولوي محمدزمان ناصري په یادو مراسمو کې وویل چې دغه انسټيټیوټ په ۱۳۹۱ کال کې د اطلاعاتو او فرهنګ وزارت د ګرځندوی معینیت په هڅو جوړ شوی دی.</p>
<p style="text-align: justify;">نوموړي زیاته کړه چې دغه انسټيټیوټ په تېرو کلونو کې د بېلابېلو لاملونو له امله لږ فعالیت درلود او خلکو ته یې لازم خدمات نه شو وړاندې کولای.</p>
<p style="text-align: justify;">نوموړي زیاته کړه، دغه انسټيټیوټ د اسلامي امارت له بیا واکمنېدو وروسته په ۱۴۰۲ کال کې د اطلاعاتو او فرهنګ وزارت په هڅو بېرته فعال شو او محصلین یې جذب کړل.</p>
<p style="text-align: justify;">ناصري وویل، د اداري چارو او نصاب له تنظیم وروسته محصلین جذب او سږ کال د ګرځندوي او هوټلدارۍ له دوو څانګو ۲۷ کسان فارغ شول.</p>
<p style="text-align: justify;">د ناصري په وینا، په انسټيټیوټ کې داسې محصلین هم شته چې اوس په ۱۳ام ټولګي کې زدهکړې کوي.</p>
<p style="text-align: justify;">نوموړي د لیلیې نشتون او د ښوونکو کمښت د دغه انسټيټیوټ ستونزې یادې کړې او د اطلاعاتو او فرهنګ له وزارته یې د حل غوښتنه وکړه.</p>
<p style="text-align: justify;">د اطلاعاتو او فرهنګ وزیر شیخ شېراحمد حقاني په دغو مراسمو کې وویل، اسلامي امارت ژمن دی چې په بېلابېلو برخو کې ځوانان وروزي او ټولنې ته یې وړاندې کړي.</p>
<p style="text-align: justify;">نوموړي زیاته کړه، سیاحت او ګرځندوی د نړۍ د اقتصاد یو مهم سکټور دی او افغانستان هم باید په دې برخه کې خپل چمتووالی ولري.</p>
<p style="text-align: justify;">نوموړي ټینګار وکړ چې مسلمان او غیرمسلمان سیلانیان د افغانستان د خلکو مېلمانه دي او باید ښه مېلمنهپالنه یې وشي څو نړۍ ته د افغانستان ښه انځور وړاندې شي.</p>
<p style="text-align: justify;">ورته مهال، د اطلاعاتو او فرهنګ وزارت د ګرځندوي، مالي او اداري معین مولوي قدرتالله جمال په دې غونډه کې وویل چې د دغه انسټيټیوټ فارغین باید سیلانیانو ته افغانستان په سمه توګه ور وپېژني.</p>
<p style="text-align: justify;">هغه له سیاحتي او زیارتي شرکتونو وغوښتل چې د دغه انسټيټیوټ فارغین جذب کړي؛ ځکه چې دغه کسان مسلکي دي.</p>
<p style="text-align: justify;">د کابل ښار د سیاحتي او درملیزو شرکتونو اتحادیې رییس احمدسیر رحیمي وویل، هیله لري چې د ګرځندوی او هوټلدارۍ انسټيټیوټ لا پراختیا ومومي او نور محصلین ترې فارغ شي.</p>
<p style="text-align: justify;">د هغه په وینا، افغانستان د هوټلدارۍ او سیاحت په سکټور کې مسلکي کسانو ته اړتیا لري او د دغه انسټيټیوټ شتون اړین دی.</p>
<p style="text-align: justify;">احمدمسعود چې د ګرځندوی څانګې له توریزم دی وویل، دوه کاله یې په دې رشته کې زدهکړې کړې دي.</p>
<p style="text-align: justify;">هغه زیاته کړه، دا رشته یې ځکه انتخاب کړې څو سیلانیانو ته د افغانستان رښتینی انځور او کلتور وروپېژني.</p>
<p style="text-align: justify;">نوموړي وویل چې په هر سمسټر کې یې اته تخصصي او فرعي مضمونونه لوستل.</p>
<p style="text-align: justify;">هغه له سیاحتي او زیارتي شرکتونو وغوښتل چې خپلو شرکتونو ته مسلکي او تجربهلرونکي کسان جذب کړي.</p>
