کابل (پژواک، ٣١ غويى ٩٦): جهادي مشر استاد سياف او د حزب اسلامي مشر ګلبدين حکمتيار په يوه ليدنه کې د سولې پر راوستو او يووالي ټينګار وکړ.
د حزب اسلامي او حراست شورا مطبوعاتي دفترونو له خوا د غويي په ٣١مه په يوه ګډه خپره شوې خبرپاڼه کې راغلي چې د حزب اسلامي مشر نن په پغمان کې د استاد عبدرب الرسول سياف له خوا په کړې مېلمستيا کې ګډون وکړ.
سرچينې زياته کړې چې په ناسته کې د ولسي جرګې پخواني رييس يونس قانوني، اوسني رييس عبدالرووف ابراهيمي، پخواني وزير اسماعيل خان، د اجرائيه رياست لومړي مرستيال انجنير محمد خان، پخواني وزير عبدالهادي ارغنديوال او د دواړو سياسي ګوندونو نورو مرکزي غړو برخه اخيستې وه.
جهادي رهبر او د حراست او ثبات شورا مشر استاد سياف په دې ناست کې د ولس پر اتحاد او يووالي او په هېواد کې د سولې پر اهميت رڼا واچوله.
هغه زياته کړه چې پخوانۍ تېروتنې بايد شا ته وغورځول شي او د هېواد د ښې راتلونکې لپاره به په ګډه کار وشي.
د حزب اسلامي مشر ګلبدين حکمتيار په هېواد کې د رښتينې او تلپاتې سولې د تأمين او د هېواد د وروڼو ولسونو تر منځ د يووالي په اړه خبرې وکړې.
نوموړي له خلکو څخه وغوښتل چې د سولې د تأمين لپاره سره لاسونه ورکړي.
حکمتيار زياته کړه: ((نن اصلي او بنسټيزه خبره په هېواد کې د سولې قيام دى، له دغه بدمرغه جنګ نه بايد ولس نجات ومومي او د سياسي ډلو ټپلو او ولسي مشرانو په مشوره د دغه بدمرغه جنګ د حل لارې ولټول شي .
په خبر پاڼه کې راغلي چې د دې ناستو نورو ګډونوالو هم په خپلو ويناوو کې په هېواد کې د سولې د تامين او په دې اړه د جهادي مشرانو د رول په اړه خپل اندونه څرګند کړل.
