کابل (پژواک، ١٤ مرغومى ٩٦) : يوې بريتانوۍ رسنۍ راپور ورکړى چې د القاعده د پخواني مشر اسامه بن لادن لمسى پر ډيورنډ پوله د امريکايي عملياتو پر مهال وژل شوى دى.
د ( ډيلي ميل) په نامه برېتانوۍ رسنۍ د مرغومي په ١٤مه، خبر ورکړى چې د اسامه وژل شوى لمسى هم اسامه نومېده او د وژل کېدو پر مهال ١٢ کلن و.
سرچينې زياته کړې چې کشر اسامه د مشر اسامه د مشر زوى حمزه زوى دى.
يادې رسنۍ هغه ليک ترلاسه کړى چې د اسامه بن لادن کورنۍ له خوا خپور شوى او په کې د کشر اسامه د مړينې خبر ورکړل شوى دى.
دغه ليک چې د اسامه بن ﻻدن د زوى حمزه له خوا ليکل شوى او د عرب ٢١ رسنۍ له لوري خپور شوى، په کې راغلي چې کشر اسامه د ډيورنډ کرښې په اوږدو کې د امريکايي ځواکونو په بمبار کې وژل شوى، خو کره سيمه يې نه ده په ډاګه کړې.
خو ځينو نورو سرچينو ويلي چې کشر اسامه د ناروغۍ له امله ساه ورکړې ده.
دغه راز ياد ليک د القاعدې اړوند د ځينو نورو ټولنيزو او رسنيزو شبکو لخوا هم خپور شوى دى.
په دې ليک کې راغلي : (( موږ د خپل قهرمان پر شهادت غمرازي کوو، خداى دې وبښي.))
د اسامه بن لادن زوى ٢٨ کلن حمزه تېر کال په يوه غږيز پيغام کې له خپلو پلويانو غوښتي وو، چې د امريکا پر ضد جګړې ته ادامه ورکړي.
د يادونې ده چې د امريکا استخباراتي ادارې سي اى اى، څو مياشتې مخکې د سلګونو زرو اسنادو د خپرولو پر مهال د اسامه بن لادن له کور څخه ځينې ترلاسه شوي اسناد او ويډيوګانې هم خپرې کړې وې چې په کې د حمزه د واده د مراسمو ويډيو هم وه.
login or register a new account.
