جلال اباد (پژواک، ۲۷ مرغومی ۹۶): د ننګرهار د کرنې او مالدارۍ رياست چارواکي وايي، په دغه ولايت کې د کبانو روزنې چارو ښه پرمختګ کړی او سلګونه کسانو ته يې د کار زمينه برابره کړې ده.
د دغه رياست د معلوماتو له مخې، يوازې په سره رود او بهسودو ولسواليو کې د کبانو روزنې دېرش لوی فارمونه جوړ شوي چې هر فارم يې په يوه روزنيزه دوره کې له دوو ټنو نيولې تر شلو ټنو پورې ماهيان روزلی شي.
دغه رياست وايي، د يو ورځنيو کبانو د نشتوالي ستونزه لا هم شته، خو د حل لپاره يې د کبانو د توليد دستګاه (هېچري) جوړولو چارې پيل شوې دي.
د ننګرهار د کرنې او مالدارۍ رييس رفېع الله رحيمزي له پژواک اژانس سره د يوې ځانګړې مرکې پر مهال وويل چې په دغه ولايت کې د کبانو د روزنې چارې ډېر پرمختګ کړی دی.
رحيمزی وړاندې وايي: ((دا چې د کبانو روزنې ته د ننګرهار ولايت هوا برابره ده او دلته تود بازار هم شته، له نورو ولايتونو هم ننګرهار ته خلک د ماهيانو د خوراک لپاره راځي؛ نو وزارت هم دغه ولايت ته لومړيتوب ورکړ.))
هغه وايي، يوازې سږ کال په سره رود او بهسودو ولسواليو کې د کبانو روزنې ۲۰ فارمونه د دولت په بوديجه او لس نور د خصوصي سکټور له خوا جوړ شوي دي.
د نوموړي د معلوماتو له مخې، د دغو فارمونو هر يو يې په يوه روزنيزه موده کې د دوه زره کبانو د روزنې وړتيا لري چې اندازه يې له دوو ټنو څخه تر شلو ټنو رسېږي.
د کرنې او مالدارۍ رييس وايي، د کبانو روزنې او دلته د فارمونو جوړېدو سلګونه خلکو ته په مستقيم او غير مستقيم ډول د کار زمينه هم برابره کړې ده.
هغه وايي: ((هر فارم کې تقريباً له درېيو نه نيولې تر لسو کسانو ته د کار زمينه برابره ده، د ماهيانو بازار ته د وړلو، د پلور، پاکولو او هوټلونو کې د پخولو په برخه کې که موږ حساب وکړو، سلګونه کسانو ته يې کاري زمينې برابرې کړې دي.))
رحيمزي زياته کړه چې لا هم د نسلي يا يو ورځني کبانو نه موجوديت د دغه کار پر وړاندې لوی خنډ دی، خو د دايمي حل لپاره يې د توليد يوه کارخانه (هېچري) تر کار لاندې ده.
دی وايي چې اوسمهال يو ورځني يا نسلي کبان له پاکستان څخه راوړل کېږي، خو په نږدې راتلونکي کې به په سره رود ولسوالۍ کې د هېچرې په نوم يوه دستګاه فعاله شي چې د کبانو توليد به کوي.
د هغه په وينا، دغه دستګاه په يوه وخت د دوو ميليونو کبانو د توليد ظرفيت لري چې پر ننګرهار سربېره به د نورو ولايتونو اړتيا هم پوره کړي.
د ننګرهار ولایت د بهسودو ولسوالۍ اړوند د پیر کلا ساحې په شاوخوا پنځلس جریبه ځمکه کې د سیمې یوه اوسېدونکي د ماهیانو د روزنې یو لوی فارم جوړ کړی دی.
په دې پنځلس جریبه ځمکه کې پنځلس لوی ډنډونه جوړ شوي چې په هر ډنډ کې نږدې زر کبان تر روزنې لاندې دي.
د دغه فارم یوه کارکوونکي شېر افضل پژواک ته وويل چې د ماهیانو بچي له ګاونډي پاکستانه راوړي، چې بیا یې دلته دوی تر روزنې لاندې نیسي.
نوموړی وايي: ((دا له هغه ځایه په اکسېجن لرونکو پلاستیکونو کې راځي چې دلته یې په وړو ډنډونو کې د شپږو میاشتو لپاره ساتي. شپږ میاشتې وروسته یې نورو لویو ډنډونو ته وړي چې هلته هم پرې شپږ میاشتې تېریږي چې بیا په جدي میاشت کې له ډنډونو باسي او بازار ته یې وړاندې کوي.))
د ماهیانو د روزنې فارم دغه کارکوونکی وايي، په یوه سیزن کې ورته شاوخوا درې سوه زره پاکستانۍ کالدارې ګټه پاتې کېږي چې له امله یې دوی له دغه کاره خوښ دي.
د جلال اباد ښار شمالي دروازې بهسودو له پله سره د کابل سيند پر غاړه ګڼ هوټلونه د دغو کبانو د خوراک ښه ګرم بازار دی.
د کبانو پخونکي او خرڅونکي وايي، خلک ترې يا د کابل او کونړ سيندونو او يا هم د نورو وطني کبانو غوښتنه کوي.
دغلته د يو هوټل مسوول نجيب الله ساپي پژواک ته وويل: ((د جلال اباد ځوانان خو هره ورځ او شپه راځي؛ خو له کابله هم دلته ډېر خلک د ماهيانو خوړلو لپاره راځي. وطني ماهيان هم خواږه دي او هم يې خلک ډېر خوښوي.))
د جلال اباد ښار اوسېدونکی محمد انور وايي، کله يې چې ملګري له کابل څخه راغلي، نو د وطني کبانو د خوراک لپاره يې بهسودو پُل ته بیايي.
دی وایي: ((د وطني ماهيانو يوه ګټه دا ده چې خلکو ته يې په هېواد کې د کار زمينه برابره کړې او بله خبره دا ده چې ډېر خوندور دي. لشکې هم ډېرې نه لري.))
د يادولو ده، اوسمهال د جلال اباد ښار په ګډون د ننګرهار په بېلابېلو سيمو کې خلک د ماهيانو خوراک لپاره د مېلې په ډول ورځي چې د تفريح تر څنګ يې ډېرو خلکو ته د کار زمينه برابره کړې ده.
غړيYou need to subscribe to view the full article. Please login or register a new account.










