کابل (پژواک، ١٢ کب ۹۶): د اسټراليا د بهرنيو چارو وزارت اعلان کړى چې د کابل پروني ځانمرګي بريد کې يې دوه وګړي ټپيان شوي دي.
د موټربم په وسيله دغه ځانمرګى بريد پرون سهار شاوخوا اته نیمې بجې د کابل ښار د نهمې امنيتي حوزې اړوند په قابل باى سيمه کې وشو.
د کورنيو چارو وزارت پرون ويلي وو چې په دغه بريد کې يو ماشوم وژل شوى او ١٤ ټپيان دي، خو د عامې روغتيا وزارت د ټپيانو شمېر ٢٢ تنه ياد کړی و او ويلي وو چې ټول ملکي وګړي دي.
بلخوا د اسټراليا د بهرنيو چارو وزارت اعلان کړى چې د ياد بريد موخه په کابل کې د دوى د سفارت کار کوونکي وو.
د بهرنيو چارو وزېرې جيولي بيشوپ د کب په ١٢مه خبريالانو ته ويلي چې په دغه بريد کې درې ملکي افغانان وژل شوي او د يو شمېر نورو افغانانو په ګډون دوه اسټراليايي امنيتي قرارداديان ټپيان شوي دي.
سرچينې ويلي چې بريدګر په کابل کې د دوى د سفارت د کارکوونکو امنيتي موټر په نښه کړى و، خو ډيپلوماتانو ته زيان نه دى اوښتى.
تر اوسه کومې ډلې د دغه بريد مسووليت پر غاړه نه دى اخيستى.
login or register a new account.
