کابل (پژواک، ١٤ چنګاښ ٩٨) : د پاکستان د لومړي وزير يو سلاکار او د واکمن ګوند مرکزي غړي ويلي، چې ډېر ژر به عمران خان د طالبانو له مشرانو سره وګوري.
بلخوا د پاکستان د بهرنيو چارو وزارت ويلي، چې عمران خان به په راتلونکو دوو اونيو کې د امريکا ولسمشر ډونالډ ټرمپ سره په سپينه ماڼۍ کې وګوري.
د پاکستان د دولتي راډيو " راډيو پاکستان" د راپور له مخې، د لومړي وزير عمران خان يو تن سلاکار نعيم الحق ويلي، چې په روانه ميلادي مياشت کې به عمران خان د طالبانو له يو شمېر استازو سره وګوري.
په سياسي چارو کې د لومړي وزير عمران خان سلاکار نعیم الحق زياته کړې، چې عمران د طالبانو سره دا کتنه د افغان حکومت سره د سلا مشورو وروسته کوي.
تر اوسه افغان حکومت په رسمي توګه څه نه دي ويلي، خو امريکا غږ د يوه افغان چارواکي له خولې خبر ورکړى، چې دا کتنه افغان حکومت سره په تفاهم کې کیږي او ټاکل شوې، چې پاکستان حکومت به افغان حکومت سره د دې کتنې جزييات شريک کړي.
وسله والو طالبانو لا د عمران خان سره د دې کتنې په اړه غبرګون نه دی ښودلی.
د تیر ۱۳۹۷ لمریز کال د سلواغې په وروستیو کې په اسلام اباد کې د صدراعظم عمران خان او د طالبانو له استازو سره کتنه وروسته له هغې لغوه شوه، چې افغان حکومت پاکستان ته د طالبانو د استازو په سفر کلک انتقادونه وکړل.
دا کتنه په داسې حال کې کېږي چې ټاکل شوې لومړى عمران خان به په نږدې اونيو کې د امريکا ولسمشر ډونالډ ټرمپ سره د کتنې لپاره واشنګټن ته لاړ شي.
د پاکستان د بهرنيو چارو وزارت وياند ډاکټر فيصل ويلي، چې عمران خان به د جولاى په ٢٢مه، په سپينه ماڼۍ کې د امريکا ولسمشر ټرمپ سره ګوري.
هغه زياته کړې، چې ددې ليدنې پر اېجنډا ددواړو هېوادونو ديپلومان کار کوي.
نوموړي ويلي، چې هېواد يې د افغان سولې پروسه کې خپلو هڅو ته به ادامه ورکوي.
login or register a new account.
