غزني ښار (پژواک، ١٨ غبرګولى ١٤٠٠): امنيتي سرچينې وايي چې وسله والو طالبانو د غزني د اب بند ولسوالۍ نيولې، خو حکومتي مسوولين وایي چې طالبانو د دغې ولسوالۍ يواځې دوه پوستې نيولې دي.
بل لورته طالبان هم وايي چې د غزني د اب بند ولسوالۍ يې نيولې او حکومتي سرتېرو ته يې مرګ ژوبله اړولې ده.
په غزني کې يوې امنيتي سرچينې د غبرګولي په ١٨ مه پژواک خبري اژانس ته وويل چې وسله والو طالبانو تېره شپه د اب بند ولسوالۍ پر ودانۍ او امنيه قوماندانۍ بريدونه کړي دي.
هغه وايي چې طالبانو د ولسوالۍ ودانۍ او امنيه قوماندانۍ دواړه نيولي او ځينو سرتېرو ته يې مرګ ژوبله هم اړولې ده.
ده زياته کړه: ((حکومتي مسوولينو ولسوالۍ او امنيې قوماندانۍ دواړه يې له تودې چينې سيمې څخه اوس د کابل-کندهار پر لويه لار يو بل ځاى ته انتقال کړي دي.))
دغه راز د اب بند ولسوالۍ يو تن سرتېري د نوم نه خپرولو په شرط پژواک ته وويل چې پرون ټوله ورځ دوى له طالبانو سره جګړه کړې خو مرسته ورته نه ده رسېدلې.
دى زياتوي: ((زموږ د ملګرو مړي پاتې شول، موږ دلته يو بل پخوانى تعمير دى چې د کابل-کندهار پر لويه لار پروت دى دلته راغلي يو.))
خو د غزني د امنيې قوماندانۍ له لوري په يوه خپره شوې خبرپاڼه کې راغلي چې طالبانو په اب بند ولسوالۍ کې يواځې دوه پوستې نيولې دي.
سرچينه وايي چې د اب بند ولسوالۍ په جګړه کې ١٧ طالبان او درې امنيتي سرتېري وژل شوي او دوه امنيتي سرتېري ټپيان شوي دي.
بل لورته د طالبانو وياند ذبيح الله مجاهد وايي چې طالبانو تېره شپه د اب بند ولسوالۍ ودانۍ او امنيه قوماندانۍ نيولي دي.
دى زياتوي چې په دې جګړه کې شپږ پوليس او يو طالب وژل شوي دي.
د يادونې ده چې په تېره يوه اوونۍ کې تر ده يک وروسته اب بند د غزني دويمه ولسوالۍ ده چې د طالبانو له لوري نيول کيږي.
Views: 241
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن