جلال اباد (پژواک، ۲۲ مرغومی ۱۴۰۰): د ننګرهار امنيې قوماندانۍ له لوري په تېره يوه اوونۍ کې د قتل، نشه يي توکو د پلور او غلا په تور ۱۵ کسان نيول شوي دي.
چارواکي وايي، دغه کسان په جلال اباد ښار، روداتو، سره رود، کوز کونړ او بهسودو ولسواليو کې نيول شوي دي.
د ننګرهار امنیې قوماندانۍ وياند عبدالبصير زابلي د مرغومي په ۲۲مه پژواک اژانس ته وويل چې د دغې ادارې اړوند منسوبينو په تېرو اتو ورځو کې په جلال اباد ښار او د سره رود، روداتو، کوز کونړ او بهسودو ولسواليو په مربوطاتو کې د بېلابېلو جرمونو په تړاو ۱۵ کسان نيولي دي.
هغه زياته کړه چې به دغو کسانو کې دوه د قتل، پنځه د نشه يي توکو او ٨ د غلا په تور نيول شوي چې اوسمهال د امنيې قوماندانۍ په نظارت خونه کې تر پوښتنو لاندې دي.
دی وایي، د نيول شوو کسانو پر دوسيو کار روان دی او ډېر ژر به عدلي او قضايي ارګانونو ته معرفي شي.
د نوموړي د معلوماتو له مخې، په نيول شوو کسانو کې شپږ وسله وال غله دي چې تېره ورځ په بهسودو ولسوالۍ کې نيول شوي دي.
هغه زياته کړه چې د غلو دغې وسله والې ډلې به د ننګرهار ولايت مختلفو سيمو کې وسله والې غلاوې کولې چې له يو عراده موټر او وسلې سره ونيول شول.
Views: 175
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن