پارون، ميدانښار (پژواک، ۱۳ مرغومی ۱۴۰۱): په ميدان وردګو کې له ۳۴۰۰ اړو کورنيو سره د خوراکي توکو او نورستان کې له ۱۲۰ زدهکوونکو سره د جمپرونو او ۱۰۰ اړو کورنیو سره د ژمنیو جامو مرسته وشوه.
د میدان وردګو ولایت د کلیو پراختیا او بیارغونې ریاست پژواک خبري اژانس ته په رالېږلې خبرپاڼه کې ویلي، نن د خوړو نړۍوال پروګرام (WFP) له خوا د دغه ولایت د نرخ ولسوالۍ له ۳ زره ۴۰۰ اړو کورنیو سره د خوراکي توکو مرسته وشوه.
سرچینه وایي، هرې کورنۍ ته ۵۰ کیلوګرامه اوړه، ۴.۵۵ ليتره غوړي، ۶.۲۵ کیلوګرامه دال او ۰.۵ کیلوګرامه مالګه ورکړل شول.
له بلې خوا، د نورستان په مرکز پارون کې له ۱۲۰ زدهکوونکو سره د جمپرونو او له ۱۰۰ اړو کورنیو سره د ژمنیو جامو مرسته وشوه.
د دغه ولایت د سرې میاشتې رییس مولوي نوراحمد حیدرزي پژواک خبري اژانس ته وویل، دغه مرسته د دې ادارې له لوري چمتو شوې وه چې نن د یوې مدرسې پر ۱۲۰ زدهکوونکو او ۱۰۰ اړو کورنیو ووېشل شوه.
هغه زیاته کړه، د مدرسې هر زدهکوونکي ته یو جمپر او هرې اړې کورنۍ ته ژمنۍ جامې – چې نارینه او ښځينه څادرونه او چپنې په کې شاملې وې – ورکړل شول.
نوموړی وايي، د یاد ولایت وګړي بېوزله دي او سخت ژمی په مخ کې لري، د دوی هڅه ده چې د اړتیا وړ مرستې ور ورسوي.
Views: 71
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن