جلالاباد (پژواک، ۲۷ وږی ۱۴۰۲): د ننګرهار ولايت په بټيکوټ ولسوالۍ کې د کليو پراختيا رياست له لوري د اته ميليون افغانيو په لګښت د پاکو اوبو دوه شبکې جوړې شوې.
مسوولين وايي، د دغو شبکو په جوړېدو سره شپږ سوه کورنيو ته د څښاک پاکو اوبو ته د لاسرسي زمينه برابره شوه.
د ننګرهار د کليو بيارغونې او پراختيا رييس مولوي قسمتالله مبارز د وږي په ۲۷مه پژواک خبري اژانس ته وويل، د دغه رياست په هڅو او نظارت د نړۍوالو بېړنيو مرستو ادارې يا CORDAID په اته ميليونو افغانيو مالي لګښت د بټيکوټ ولسوالۍ په جنتيانو او نبوري غونډۍ سيمو کې د پاکو اوبو دوه شبکې جوړې شوې.
هغه زیاته کړه، د دغو شبکو په جوړېدو سره د دغو کلیو شپږ سوه کورنیو ته د څښاک پاکو اوبو ته د لاسرسي زمينه برابره شوه.
د سيمې خلک د دغو شبکو جوړېد ته خوښ دي.
د سيمې يوه قومي مشر روحالله خان وويل، له کلونو راهیسې د دې سيمې خلکو د ويالو اوبه څښلې چې ډول ډول ناروغۍ ورته پیدا کېدلې.
خو هغه وايي چې د دغو شبکو جوړېدو ته خلک خوشحاله دي او د پاکو اوبو د نشتون ستونزه یې هواره شوه.
د کليو بيارغونې او پراختيا رياست مسوولين وايي، هڅه کوي چې د دغه ولايت ټولو سيمو کې د څښاک پاکو اوبو ورته شبکې جوړې کړي.
Views: 13
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن