کابل (پژواک، ۴ سلواغه ۱۴۰۲): چارواکي وايي، د افغانستان تحصیلي او تعليمي نظام له کمزورتيا سره مخ دی، نو تعليمي او تحصيلي بنسټونو دې د اسلامي اصولو په رڼا کې، د دنيا له غوښتونو سره د برابر تعليمي او تحصيلي نظام جوړولو لپاره کار وکړي.
نن کابل کې د افغانستان د ښوونیزو او لوړو زدهکړو بنسټونو د پیاوړتیا دوه ورځنی ملي کنفرانس جوړ شو.
په دغه کنفرانس کې لوړپوړو حکومتي چارواکو او د بېلابېلو دولتي او خصوصي پوهنتونونو استادانو برخه لري.
د لوړو زدهکړو وزارت د ښوونې او روزنې پوهنتون علمي مرستيال پوهاند دوکتور جمشېدخان رشيدي وویل، د پوهنې او لوړو زدهکړو بنسټونو ترمنځ د ښې همغږۍ رامنځته کول، د افغانستان د ښوونيز او لوړو زدهکړو نظام د عمومي وضعيت ارزول، د پوهنې او لوړو زدهکړو بنسټونو په نصاب کې د ستونزو رابرسېره کول، له نړۍوال ښوونيز او لوړو زدهکړو بهير سره د افغانستان د ښوونيز او لوړو زدهکړو بنسټونو سيال کول او د پرمختګ لپاره یې د لازمو لارو موندل او څېړل، د دغه کنفرانس له موخو دي.
پوهاند رشيدي، د اسلامي امارت له پاليسۍ سره سم د تعليمي او تحصيلي بنسټونو پياوړتيا، د لوړو زدهکړو پر وړاندې د ننګونو ختمول، د افغانستان د تعليمي او تحصيلي بنسټونو د ضعف لاملونه او ورته حل لارې پيدا کول، ټولنې ته د علمي کادرونو وړاندې کولو برخه کې د ستونزو پېژندل او حل لارې يې څرګندول، د افغانستان په محرومو سيمو کې د زدهکړو پر وړاندې پراته خنډونه څرګندول او حل لارې يې هم د دغه کنفرانس له موخو وبلل.
د رياستالوزراء سیاسي مرستیال مولوي عبدالکبير یاد کنفرانس کې وویل: «په دې کې شک نشته چې موږ افغانستان په پښو دروو، اقتصاد يې مخ پر وړاندې وړو، فرهنګي امور يې مضبوطوو، ټولنيز ثبات ورپه برخه کوو، دا کارونه له علم او پوهې پرته ناشوني دي.... اسلام د علم او پوهې دين دی او د پوهې په حاصلولو يې امر کړی.»
هغه زیاته کړه چې د افغانستان تعليمي او تحصيلي بنسټونو دې خپل تعليمي او تحصيلي نظام د اسلامي اصولو په چوکاټ کې د دنيا له غوښتونو سره سم برابر کړي.
د پوهنې وزارت سرپرست وزير مولوي حبیبالله آغا په یاد کنفرانس کې وویل: «که د دين علم دی او که د دنیا علم، زموږ د معلوماتو مطابق کیفیت يې ډېر مخ په کمزورۍ روان دی؛ دا چې د اسلامي امارت نظام دی او اسباب يې هم برابر دي او وخت يې هم راغلی او امکانات يې هم تر يوې اندازې شته؛ که موږ د دغو علومو د کیفيت په ښهوالي کې کوښښ ونه کړو، په اخرت کې به الله (ج) له موږ سره سخته محاسبه وکړي.»
هغه زیاته کړه، که د ديني او عصري علومو کيفیت په همدې ډول پاتې شي، افغانستان به بيا هم له بېلابېلو یرغلونو سره مخ شي.
د هغه په وينا، که د ديني علومو برخه بېکيفیته وي، افغانستان به بیا بيا له فکري او عقيدوي يرغل سره مخ وي او که د عصري علومو برخه بېکیفيته وي نو هېواد به تل په ذلت او خوارۍ کې وي.
د پوهنې سرپرست وزير وویل: «تر شپږم ټولګي د ښوونځيو نصاب اصلاح شوی او له شپږم پورته نصاب پر اصلاح هم کار روان دی، څو د هېواد بچيان په کامله اسلامي او ملي روحيه وروزل شي.»
د افغانستان د لوړو زدهکړو سرپرست وزير مولوي ندامحمد نديم په یاد کنفرانس کې وویل چې د یوه نظام د بنسټ ډبره د پوهنې وزارت او د نظام تشکیلاتي قوه د لوړو زدهکړو وزارت دی؛ نو د نظام د هرې برخې مسوولین اړ دي چې له دغو علمي او تحصیلي وزارتونو سره همکار پاتې شي.
هغه زیاته کړه: «موږ د دغه کنفرانس په جوړښت باندې مسلسل کار وکړ، هدف مو ترې د علمي ډګر ترقي وه او هیلهمند یو چې د علمي ظرفیت لوړونې سبب وګرځي.»
دی زیاتوي، اسلامي نظام کیفیت ته لومړيتوب ورکوي او هڅه کوي چې لومړی تعلیمي او تحصیلي بنسټونه معیاري او با کیفیته کړي.
دغه کنفرانس سبا هم داوم لري او د هېواد د بېلابېلو پوهنتونونو د استادانو له لوري به جوړې شوې علمي مقالې وړاندې شي.
GET IN TOUCH
NEWSLETTER
SUGGEST A STORY
PAJHWOK MOBILE APP