نیلي (پژواک، ۶ غبرګولی ۱۴۰۳): دایکنډي کې ځايي مسوولین وايي چې د دغه ولایت په اشترلي ولسوالۍ کې خلکو په خپل شخصي لګښت ۲۲ کیلومتر سړک جوړ کړی دی.
د دایکنډي د اشترلي ولسوال مولوي عبدالسلام مزمل پژواک خبري اژانس ته وویل، د ۲۲ کیلومتره اوږدوالي او پنځه متره سور په درلودو یاد سړک د دې ولسوالۍ له «دهنګردېش» تر «قلعۀ خدیرباش» سیمې پورې د خلکو په یو میلیون او ۶۰۰ زره افغانیو شخصي لګښت جوړ شوی دی.
هغه زیاته کړه، دغه سړک چې د دایکنډي – کابل لویه لار یې اته ساعته لنډه کړې، تېره ورځ د مسوولینو او ځايي خلکو په شتون کې ګټې اخیستنې ته وسپارل شو.
هغه وویل چې د دغه سړک جوړولو لګښت د اشترلي ولسوالۍ د اوسېدونکو لسو شوراګانو له لوري راټول شوی دی.
په همدې حال کې، د اشترلي ولسوالۍ اوسېدونکي حاجي نېکمحمد پژواک ته وویل چې د دغه سړک جوړول د ولسوالۍ د خلکو یوه جدي اړتیا وه؛ ځکه له سختو ستونزو سره مخ وو.
هغه زیاته کړه: «کلونه مو سړک نه درلود او لرې فاصلې به مو پیاده او په سختۍ طی کولې، څو ځله مو حکومت ته وړاندیز وکړ خو جوړ نه شو.»
د هغه په خبره، پر دې سربېره چې د خلکو اقتصادي وضعیت ډېر خراب دی، خو بیا یې هم تېر کال پیسې راټولې کړې او د دغه سړک جوړولو کار یې پیل کړ.
نوموړي له حکومته د بیارغونې او پرمختیاي برخو د مرستې غوښتنه وکړه.
دا په داسې حال کې ده چې له مخکې د اشترلي ولسوالۍ اوسېدونکو په خپل شخصي لګښت لسګونه کیلومتره نور سړکونه هم جوړ کړي دي.
Views: 10
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن