بادغیس کې امنیتي ځواکونو دوه ملکي وګړي ټپیان کړي

قلعه نو (پژواک، ٢٣ چنګاښ ٩٦): چارواکي وايي، د اردو ځواکونو د بادغيس ولايت په ابکمري ولسوالۍ کې پر دوو ملکي موټرسايکل سپرو د وسله والو مخالفينو ګومان کړى او پر ډزو يې ټپيان کړي دي.

په بادغيس کې د ملي اردو د درېيمې لوا وياند عبدالقدير پژواک خبري اژانس ته وويل چې دغه پېښه تېره ورځ ناوخته د ابکمري ولسوالۍ په "قيامت قول" سيمه کې رامنځته شوې ده.

د ده په وينا، د ملي اردو ځواکونو په ياده سيمه کې د دولت وسله والو مخالفينو ته کمين نيولى و.

دى وايي، ياد دوه تنه چې پر موټرسايکل د کمين په سيمه کې تېرېدل، سره له دې چې د اردو ځواکونو د درېدو امر ورته کړى او بيا يې هوايي ډزې پرې وکړې، نه و درېدلي.

دى وايي چې وروسته يادو ځواکونو پر دغو دوو تنو د وسله والو مخالفينو ګومان کړى و او ډزې يې پرې کړې وې.

ده وويل چې دغه دوه تنه د ابکمري ولسوالۍ د پهلوانانو سيمې اوسېدونکي دي او د فراه ښار ته د توکو پېرلو په موخه روان وو چې له دې پېښې سره مخ شول.

دغه دوه تنه د فراه په ولايتي روغتون کې تر درملنې لاندې دي.

د دغه روغتون سرپرست مشر ډاکټر عبداللطيف وايي چې د يادو دواړو ټپيانو روغتيايي حالت د ډاډ وړ دى.