د بلخ سيمه ييز پوليس د نا مسوولو وسله والو تر اغېز لاندې دي

مزارشريف (پژواک، ۲۷چنګاښ، ۹۶): د بلخ امنيتي مسوولين وايي چې د دغه ولايت ځيني سيمه ييز پوليس د نا مسوولو وسله والو تر اغېز لاندې دي.

د بلخ په شولګر، چمتال او چاربولک ولسواليو کې له تېرو څو کلونو د امنيت د ټينګښت په موخه د ملي پوليسو په چوکاټ کې د سيمه ييزو پوليسو جوړښت هم رامنځته شوی دی.

که څه هم ځلونه د سيمې اوسېدونکو د سيمه ييزو پوليسو د ناسمو او غير قانوني کړنو پر وړاندې غږ پورته کړی خو د امنيتي مسوولينو به يې پر وړاندې چوپتيا ښوده.

د بلخ امنيه قوماندان پاسوال سيد کمال سادات پژواک ته د دې خبرې پخلی وکړ چې د سيمه ييزو پوليسو په ليکو کې ستونزې شته دي.

نوموړي په سيمه ييزو پوليسو کې د پخوانيو قوماندانانو شتون د اندېښنې وړ مسئله وبلله.

سادات همداراز په ولسواليو کې سيمه ييز پوليس د غير مسوولو وسله والو تر اغېز لاندې وبلل.

بلخوا د شمال زون د بشر حقوقو خپلواک کمېسيون مسوول سيدمحمد سامع پژواک ته وويل چې پوليس بايد مسلکي چلند وکړي.

نوموړي زياته کړه، که چېرې عام خلک پوليسو ته د قومي، ژبني او سمتي اړيکو له امله د خپل زړه خبره ونه شي کړای نو دې ته بحران وايي.

د هغه په وينا، پوليس بايد له هر ډول اړيکو پالنې پرته د خلکو د خدمتګارانو په توګه چلند  ولري.

د بلخ مدني فعالان بيا د خلکو له خوا د پوليسو د کړنو پر څارنې ټينګار کوي.

مدني فعال حيات الله جواد پژواک ته وويل، داسې جوړښتونو ته بايد وده ورکړل شي چې خلکو ته په خپلو پوليسو د څارنې اسانتيا برابره کړي.

نوموړي زياته کړه چې که پوليس د خلکو تر څارنې لاندي وي، نو پر کړنو يې مثبت اغېز ښندلی شي.

login or register a new account.