د زابل عدلیې ریاست کې دوه کسان وژل شوي

کلات (پژواک، ٢٧ لړم ٩٦): د زابل ولايت عدليې رياست ته د حقوقي دعوې د حل لپاره ورغلي دوه کسان د مقابل لوري له خوا د یاد رياست په یوه خونه پر ډزو وژل شوي دي.

د زابل د امنیت امر سمونوال غلام جیلاني فراهي د لړم په ٢٧مه پژواک خبري اژانس ته وويل چې دغه دوه کسان نن د عدليې په رياست کې هغه مهال ووژل شول چې د حقوقو مديريت ته د خپلې حقوقي دعوې د حل په موخه ورغلي وو.

هغه زياته کړه چې د دوى مخالف لوري پرې ډزې کړې، دواړه يې وژلي، يو بل کس ټپي دی او بريدګر په تېښته بريالى شوى دى.

خو هغه وايي چې پوليسو يې په اړه پلټنې پيل کړې دي.

خو د زابل د عدليې رياست د حقوقو مدير شفیق الله پژواک ته ووی، دواړو لورو خپل منځ کې د حقوقي دعوې په اړه دلايل ويل، يو لوري تومانچه را و ايسته او په مقابل لوري يې ډزې وکړې.

د هغه په وينا، بريدګر  تر ډزو وروسته له دفتره وتلى او تښتېدلى دى.

يوې بلې امنيتي سرچينې پژواک ته وويل چې قاتل کريم الله نومېږي، په پوليسو کې دنده لري او د ميزانې ولسوالۍ اوسېدونکى دى.

دغه راز مقتولين هم د مېزانې ولسوالۍ اوسېدونکي دي.