کابل (پژواک، ٢٨ کب ٩٦): په افغانستان کې د ناټو او امريکايي ځواکونو عمومي قوماندان جنرال نيکولسن وايي چې تر اوسه د پاکستان له خوا د مثبتو اقداماتو نښې نښانې نه دي ليدل شوې او نه هم په افغانستان کې تاوتريخوالى کم شوى دى.
جنرال نيکولسن دغه څرګندونې د کب په ٢٨مه په کابل کې د ناټو د روزنې ماموريت مرکزي قوماندانۍ کې د افغانستان د نوي لمريز کال په مناسبت په يوه خبري غونډه کې وکړې.
هغه د نوي لمريز کال مبارکي ټولو افغانانو ته ورکړه او هيله يې څرګنده کړه چې نوى کال د افغانانو د خوښۍ، سوکالۍ، سولې او ثبات کال وي.
جنرال نيکولسن د افغانانو له مېلمه پالنې مننه وکړه او زياته يې کړه چې دوى د افغانانو د ښې راتلونکي لپاره دلته دي.
نوموړي زياته کړه چې ولسمشر غني وسله والو طالبانو ته د سولې ښه او مثبت وړانديز ورکړى، څو په دغه هېواد کې سوله او ثبات رامنځته شي.
دى وايي: "موږ به ترهغو له تاسو سره يو چې تاسو يې غواړئ."
هغه د ۹۷یم کال په اړه وويل چې جګړې به دوام لري، خو د دې تر څنګ به د سولې لپاره هم ټول اړخونه خپلو هلو ځلو ته ادامه ورکوي.
نوموړي د لاتيني امريکايي هېواد کولمبيا ته په اشارې سره وويل چې هلته هم د سولې د خبرو تر څنګ جګړې هم روانې وې او تېر کال په کې د سولې تړون لاسليک شو.
د ناټو او امريکايي ځواکونو لوى قوماندان جنرال نيکولسن وويل چې د سولې د خبرو تر څنګ پر وسله والو طالبانو او نورو ډلو نظامي فشار هم راوړل کېږي.
خو په ډاګه يې کړه چې طالبان هېڅکله د جګړې له لارې بريا نه شي ترلاسه کولى.
جنرال نيکولسن دغه راز وويل چې د پوځي فشار تر څنګ به پر طالبانو ټولنيز او مذهبي فشار هم اچول کېږي.
د هغه په وينا، افغانان په ټولنيزو شبکو او په ټاکنو کې د پراخې ونډې اخيستلو سره پر طالبانو يو ډول فشار راوړی، دغه راز په اندونيزيا کې د علماوو کنفرانس له جوړېدو سره به پر هغوى يو ډول مذهبي فشار هم راوړل شي.
login or register a new account.
