مزارشریف (پژواک، ۹ سلواغه ۹۹): په بلخ کې د ملي اردو د درېيمې لوا د دويم کنډک قوماندان د طالبانو بريد کې وژل شوی دی.
په شمال زون کې د ۲۰۹ شاهين قول اردو مطبوعاتي مسوول حنيف رضايي پژواک اژانس ته وويل، چې بلخ کې د ملي اردو د درېيمې لوا د دویم کنډک قوماندان ډګرمن نصرت الله يمين نن غرمه د بلخ ولسوالۍ په علم خېل کلي کې وژل شوی دی.
هغه زياته کړه، په دغه بريد کې د ملي امنيت يو سرتېری هم وژل شوی او د ملي اردو څلور نور سرتېري ټپيان شوي دي.
د شاهين قول اردو مطبوعاتي مسوول همدا راز وويل، چې په سيمه کې د ملي اردو پر يوې قرارګاه طالبانو د هاوان بريد کړی او دغه مرګ ژوبله يې اړولې ده.
رضايي زياتوي، له دغې پېښې وروسته د شاهين قول اردو قوماندان د ملي اردو ځواکونو ته امر کړی، چې له دفاعي حالت څخه تعرضي حالت ته لاړ شي.
يوې باوري سرچينې بيا پژواک ته وويل، چې په دغه پېښه کې د ملي اردو شاوخوا ۱۵ سرتېرو ته مرګ ژوبله اوښتې ده.
تر اوسه طالبانو د ياد بريد په اړه رسنيو ته څه نه دي ويلي.
Views: 34
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن