کابل (پژواک، ۱۶ وری ۱۴۰۰): د ملي امنيت لوی ریاست وايي، ځانګړو ځواکونو يې د عملياتو په ترڅ کې په کابل کې د حقاني شبکې د سترو بريدونو یو طرح کوونکی او د جمهوري ریاست د لومړي مرستیال امرالله صالح پر دفتر د برید طراح نیولی دی.
دغه مطلب په هغې خبرپاڼه کې په ډاګه شوی چې له ياد شوي رياست څخه پژواک خبري اژانس ته رالېږل شوې ده.
سرچينه کاږي، عبیدالله په فاروق، بلال او ابراهيم مستعارو نومونو په ۱۳۹۶ کال کې د پاکستان په پېښور ښار کې حقاني شبکې ته جذب او نظامي زده کړې يې په پېښور کې د حقاني شبکې په يوه نظامي کمپ کې سرته رسولې او له نظامي زده کړو وروسته د کويټې شورا ته تللی او هلته یې د افغانستان په داخل کې ځانمرګي بريدونو ترسره کولو ته چمتووالی اعلان کړی و.
سرچينه زياتوي، د نوموړي لومړنی هدف او دنده چې ده ته ورکړل شوې وه، پر جبار قهرمان ځانمرګی بريد ترسره کول و چې د يوه بېوزله محصل په جامه کې يې ځان هغې لیليې ته چې د جبار قهرمان له خوا يې نظارت کېده، رسولی و، خو د جبار قهرمان په وژل کېدو سره دغه عملیات لغوه شول.
په خبرپاڼه کې راغلي چې نوموړی د نويو امرونو اخیستلو لپاره د پاکستان پېښور ښار ته لاړ او هلته ورته د مولوي نېک محمد له خوا چې د حقاني شبکې د انفجاراتو د برخې مسوول و امر وشو ترڅو پر امرالله صالح باندې ځانمرګی برید طرح کړي.
سرچينه وايي، نوموړی د زرغون بهير د يو تن غړي له پوښښ څخه په استفادې په نوموړي بهير کې يې ځان ځای پر ځای او په دې هکله يې مولوي نېک محمد ته هم اطمينان او معلومات ورکړي و، له هغه وروسته د مولوي نېک محمد له خوا ورته دنده سپارل شوې وه ترڅو څو تنه نور ځانمرګي هم د زرغون بهير د غړو په پوښښ کې په څو نورو ولايتونو کې هم ځای پر ځای کړي چې د همدغه پلان په پايله کې د زرغون بهير پر دفتر يو ځانمرګی بريد هم ترسره شو.
د ملي امنيت رياست په ډاګه کوي چې عبیدالله نومی د امر الله صالح پر دفتر طرح شوي بريد کې د کابل ښار په مختلفو سيمو کې د خارجي موټرو د وخت او ځای د څارنې مسوولیت په غاړه درلود، همدارنګه نوموړي د يادو پلانونو تر عملي کېدو وروسته د حقاني شبکې له خوا د ولسمشر، د هغه د مرستيالانو، د مصالحې عالي شورا د مشر، رحمت الله نبیل، مدني ټولنو فعالانو، د ټولنيزو رسنيو او بانفوذه شخصيتونو د موټرو پر کاروانونو د برید مسوولیت هم اخیستی و.
د سرچينې د معلوماتو په اساس، نوموړي په دې وروستيو کې پلان درلود چې پر مدني فعالې سيلۍ غفار ځانمرګی بريد ترسره کړي چې د ملي امنيت لوی ریاست ځواکونو د هڅو په پايله کې د عبیدالله نومي استوګنځای معلوم او د ملي امنیت د عملياتو په ترڅ کې د کابل ښار له درېيمې ناحيې څخه ونيول شو.
خو وسله والو مخالفينو د ملي امنيت د پورتنيو څرګندونو په اړه تراوسه پورې څه نه دي ويلي.
Views: 68
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن