هرات (پژواک، ۱۶ غبرګولی ۱۴۰۰) : په بادغیس ولایت کې د ماین چاودنې له امله د ښځو او ماشومانو په ګډون ۱۱ کسان وژل شوي دي.
د بادغیس والي حسام الدین شمس پژواک خبري اژانس ته وویل چې دغه چاودنه پرون تر غرمې وروسته د ملکي وګړو پر هغه موټر شوې چې له ابکمري ولسوالۍ څخه د ولایت د مرکز قلعه نو پر لوري روان و.
هغه زیاته کړه، چاودنه د چرانک و ګنداب په کلي کې شوې چې له امله یې ۱۱ ملکي وګړي وژل شوي دي.
والي وايي چې په وژل شویو کسانو کې درې ماشومان، څلور ښځې او څلور نارینه شامل دي.
شمس وویل چې له چاودنې وروسته موټر لاندې کندې ته لوېدلی او کېدای شي مرګ ژوبله له دې هم ډېره وي.
د هغه په وینا، دغه ماین د وسله والو طالبانو له خوا ځای پر ځای شوی و، خو طالبانو تر اوسه په دې اړه څه نه دي ویلي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن